សម្ដេចតេជោ ហ៊ុន សែន នៅព្រឹកថ្ងៃទី ០៥ ខែមករា ឆ្នាំ ២០២២ នេះ បានបញ្ជាក់ឱ្យបានដឹងថា កាលពីម៉ោង ៦ ល្ងាចម្សិលមិញ របាយកាណ៍អ្នកឆ្លងជំងឺកូវីដ-១៩ ដែលបានដល់ដៃសម្ដេច គឺមាន ០៩ ករណី ដែលនាំចូលតាមយន្តហោះ ជាមេរោគបំប្លែងថ្មី អូមីក្រុង តាមការវិភាគពីវិទ្យាស្ថានប៉ាស្ទ័រកម្ពុជា។
សម្ដេចបានថ្លែងបែបនេះ នៅព្រឹកថ្ងៃទី ០៥ ខែមករា ឆ្នាំ ២០២២ ក្នុងពិធីអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីប្រគល់ប្រាក់រង្វាន់ជូនកីឡាការនី អ៊ុក ស្រីមុំ ក្រោយដណ្ដើមបានមេដាយមាសពិភពលោក ពីការប្រកួតប៉េតង់នៅទីក្រុង សាន់តាស៊ូសាណា ប្រទេសអេស្ប៉ាញ កាលពីថ្ងៃទីខែវិច្ឆិកា ឆ្នាំ ២០២១ កន្លងទៅ។
ក្នុងនោះសម្ដេចបានបញ្ជាក់ផងដែរថា ក្នុងចំណោមអ្នកកើតអូមីក្រុងទាំង ០៩ នាក់ ខាងលើ គឺមានជនជាតិអាមេរិច ០២ នាក់ ជនជាតិខ្មែរដែលមកពីអាមេរិក ០២ នាក់ ជនជាតិបារាំង ០១ នាក់ ហ្វីលីពីន ០១ នាក់ ឥណ្ឌា ០១ នាក់ ម៉ាឡេស៊ី ០១ នាក់ ខណៈនៅក្នុងសហគមន៍ពុំទាន់មានការឆ្លងនោះទេ។
យ៉ាងណាមិញ ទន្ទឹមទៅនឹងការលើកឡើងនៃបញ្ហាជំងឺកូវីដ-១៩ ប្រភេទ «អូមីក្រុង» ខាងលើ សម្ដេចក៏បានដាក់បទបញ្ជាដាច់ណាត់ជាសាធារណៈ សុំការយោគយល់ចំពោះអ្នកឆ្លងកូវីដបំប្លែងថ្មី «អូមីក្រុង» ត្រូវតែព្យាបាលនៅតាមមន្ទីរពេទ្យ ទោះជាអ្នកណា ឬ នៅទីណាក៏ដោយ ខណៈដែលយើងត្រូវមានការប្រុងប្រយ័ត្ន និង បន្តប្រយុទ្ធប្រឆាំងកូវីដ-១៩ ជាពិសេសប្រភេទបំប្លែងថ្មីអូមីក្រុងនេះ៕
