ការពារទាំងអស់គ្នា! អ្នកឆ្លងកូវីដបម្លែងថ្មី «អូមីក្រុង» បានធ្វើដំណើរទៅច្រើនកន្លែង មានខេត្តចំនួន ៣ និង ភ្នំពេញ

នៅថ្ងៃទី ០៨ ខែមករា ឆ្នាំ២០២២ ក្រសួងសុខាភិបាលនៃព្រះរាជាណាចក្រកម្ពុជា ​បានចេញសេចក្តីប្រកាស​ផ្តល់ជាដំណឹងដល់​សាធារណជនឱ្យបានជ្រាបថា ​ក្នុងពេលថ្មីៗនេះ ក្រសួង បាន​រកឃើញករណីវិជ្ជមានកូវីដបម្លែងខ្លួនថ្មី ប្រភេទ «អូមីក្រុង» ចំនួន ១នាក់ ដែលមានលទ្ធផលវិភាគបញ្ជាក់ដោយវិទ្យាស្ថាន ប៉ាស្ទ័រកម្ពុជា។

ដោយករណីនេះ គឺជាករណីឆ្លងក្នុងសហគមន៍ ចំពោះករណីឆ្លងកូវីដបម្លែងថ្មី ប្រភេទ «អូមីក្រុង» ខាងលើនេះ ​ត្រូវបានរកឃើញលើបុរស​ជនជាតិខ្មែរ អាយុ ២៣ឆ្នាំ ​ស្នាក់នៅទួលសង្កែ ខណ្ឌឬស្សីកែវ រាជធានីភ្នំពេញ បច្ចុប្បន្នបុរសរូបនេះ ត្រូវបានដាក់ឱ្យសម្រាកព្យាបាលនៅមណ្ឌលព្យាបាលអូឡាំពិច រាជធានីភ្នំពេញ។

យ៉ាងណាមិញ តាំងពីថ្ងៃទី ២៧ ខែធ្នូ ឆ្នាំ២០២១ ដល់ថ្ងៃទី ៥ ខែមករា ឆ្នាំ២០២២ បុរសរូបនេះ បានធ្វើដំណើរទៅជាច្រើនកន្លែង ដូចជា នៅរាជធានីភ្នំពេញ ខេត្តកំពង់ធំ ខេត្តសៀមរាប និង​ទៅលេងទីតាំងមួយចំនួន នៅតានីទូកមាសខេត្តកំពត។ ​ដោយធ្វើដំណើរ​ជាមួយបងប្អូនជីដូន​មួយមកពីប្រទេសអូស្រ្តាលី ​មកដល់រាជធានីភ្នំពេញនៅថ្ងៃទី ២៧ ខែធ្នូ ឆ្នាំ២០២១ ហើយនៅថ្ងៃទី ០៥ ខែមករា ឆ្នាំ២០២២ ​គាត់បានទៅកំដរអ្នកជំងឺដែលជាបងប្អូនជីដូនមួយគាត់នៅឯមន្ទីរពេទ្យមួយ ហើយក្រោយមកក៏បានរកឃើញមានវិជ្ជមានវីរុសកូវីដ-១៩បម្លែងថ្មី ប្រភេទ «អូមីក្រុង»៕