ព្រះអើយ! ក្រុមជំនាញប្រកាសឈប់ជ្រមុជទឹករក Tangmo ហើយ តែចាប់ផ្តើមធ្វើរឿងនេះវិញ
ព័ត៌មានការបាត់ខ្លួនរបស់តារាសម្តែងស្រីល្បីឈ្មោះ Tangmo បានក្លាយជាព័ត៌មានដ៏ក្តៅគគុកក្នុងបណ្តាញសង្គម ដោយពេលកើតហេតុគឺនៅយប់ថ្ងៃទី ២៤ ខែកុម្ភៈ ឆ្នាំ ២០២២។
Tangmo ត្រូវបានគេរាយការណ៍ថា បានចេញជិះទូកកម្សាន្តជាមួយមិត្តភក្តិនាងចំនួន ៥ នាក់ផ្សេងទៀត ដោយទូកដែលនាងជិះជាប្រភេទ Speed Boat ពណ៌ស ដែលមានអ្នករួមដំណើរសរុបចំនួន ៦ នាក់ទាំងសាមីខ្លួន (ប្រុស ៣ ស្រី ៣)។ តាមរយៈព័ត៌មានបឋម បានឱ្យដឹងថា នាងបានរអិលធ្លាក់ចូលទឹកពេលព្យាយាមឈរថតរូប ស្របពេលដែលទូកក្រវី ហើយបានបាត់ខ្លួនរហូតមកទល់ពេលនេះរកមិនទាន់ឃើញ មិនដឹងស្លាប់ ឬរស់។
យ៉ាងណាមិញ មុននេះបន្តិចក្រុមកងកម្លាំង និង អ្នកជំនាញជ្រមុជទឹកថៃ បានប្រកាសឱ្យដឹងពីការផ្លាស់ប្តូរផែនការ ដោយសម្រេចបញ្ចប់ការស្វែងរក តាមរយៈការជ្រមុជទឹកត្រឹមម៉ោង ៤ និង ៣០ នាទីល្ងាចថ្ងៃនេះ ហើយមករៀបផែនការថ្មីចំពោះការស្វែងរកលើផ្ទៃទឹកវិញ។
តាមការបញ្ជាក់បានឱ្យដឹងថា ការសម្រេចបញ្ចប់នេះគឺធ្វើឡើង ក្រោយក្រុមអ្នកជ្រមុជទឹកស្វែងរកបានចំណាយពេលអស់ជាង ១៥ ម៉ោង ដើម្បីជ្រមុជស្វែងរក តែនៅតែគ្មានដំណឹង ហេតុដូចនេះ គឺនឹងមកផ្លាស់ប្តូរលើការត្រួតពិនិត្យលម្អិតលើផ្ទៃទឹកវិញ ព្រោះថាប្រសិន តារាស្រីនេះបានលង់ទឹក នោះសពអាចនឹងអណ្តែតឡើងឆាប់ៗនេះជាមិនខាន។ ហេតុផលនេះគ្រាន់តែជាការសន្និដ្ឋានទុកប៉ុណ្ណោះ ដោយពេលនេះអ្វីៗមានតែសង្ឃឹមលើបាដិហារិយ៍ និង ជោគជតារបស់ Tangmo ថានាងអាចរស់រានមានជីវិតឬទេ៕
ប្រភព៖ NineEntertain
