ញាក់! Fan វណ្ណដា ប្រមូលគ្នាត្រៀមលុយច្រើនសន្ធឹក ដើម្បីធ្វើរឿងដ៏អស្ចារ្យនេះ ពេល Album «$KULL 2» ចេញ

បើគិតមកដល់ឆ្នាំ ២០២២ នេះ រយៈពេលប្រមាណជិត ២ ឆ្នាំ មកហើយ ដែលតារាចម្រៀងរ៉េបវ័យក្មេងលំដាប់ប្រទេស វណ្ណដា បានចេញនូវ Album ចម្រៀងដំបូងរបស់ខ្លួនមានឈ្មោះថា «The $KULL Album» កាលពីអំឡុងខែមិថុនា ឆ្នាំ ២០២០ កន្លងទៅ។

ក្នុងនោះ បន្ទាប់ពីការចេញនូវ Audio ចំនួន ១៨ បទ ព្រមទាំង MV ក្នុង «The $KULL Album» តារាចម្រៀងរ៉េប វណ្ណដា ក៏កាន់តែមានប្រជាប្រិយភាពស្ទុះហក់ឡើងខ្លាំង និង ទទួលបានការចាប់អារម្មណ៍កោតសរសើរជាច្រើនពីសំណាក់មហាជនទាំងក្នុង និង ក្រៅប្រទេស។

ក្រោយពីទទួលបានជោគជ័យយ៉ាងខ្លាំងលើ Album ចម្រៀងដំបូង ដែលបានសម្រិតសម្រាំងអស់រយៈពេលប្រមាណជា ៨ ឆ្នាំ នោះ លោក វណ្ណដា ក៏ធ្លាប់បានឱ្យដឹងថា លោកនឹងត្រៀមបង្ហាញស្នាដៃថ្មីបន្ថែមនៅក្នុង «The $KULL Album 2» ជូនដល់អ្នកគាំទ្រ ក្នុងពេលឆាប់ៗខាងមុខនេះ។

ស្របពេលក្នុងការរង់ចាំ «The $KULL Album 2» របស់តារាចម្រៀងរ៉េបប្រចាំផលិតកម្ម បារមី នេះដែរ បើតាមការឱ្យដឹងតាមរយៈ fan page របស់ វណ្ណដា ដែលមានឈ្មោះថា «THE VANNDA» ក៏កំពុងតែត្រៀមធ្វើរឿងពិសេសដល់ Idol របស់ខ្លួនផងដែរ។ ក្នុងនោះ អ្នកគាំទ្រជាច្រើនបានប្រកាសកំពុងប្រមូលគ្នា ត្រៀមលុយច្រើនសន្ធឹកដាក់បង្ហាញប៉ាណូ នៅផ្សារទំនើបអូឡាំព្យាទៀតផង។

តាមរយៈ fan page «THE VANNDA» បានឱ្យដឹងថា៖ «យើងដឹងហើយថា Vannda នឹងធ្វើការត្រលប់មកវិញជាមួយ Album $KULL 2 របស់ខ្លួននៅពេលឆាប់ៗខាងមុខនេះ! ពួកយើងនឹងមានការអបអរសាទរ មួយសប្តាហ៍ពេញតែម្តង មុនការវិលត្រលប់មកវិញរបស់ វណ្ណដា។ Page THE VANNDA ក៏រួមទាំង THE VANNDA FAM នឹងធ្វើការចាក់បញ្ជាំងនៅលើផ្ទាំងប៉ាណូនៅក្លោងទ្វារចូលផ្សារទំនើបអូឡាំព្យា តែម្តង។ វត្ថុបំណង ដើម្បីអបអរការត្រលប់មកវិញនៅអាល់ប៊ុមថ្មីរបស់ វណ្ណដា។ ដើម្បីឱ្យ project នេះដើរទៅមុខបាន ខ្ញុំម្នាក់ឯងមិនអាចរ៉ាប់រងបានទេ ក៏ត្រូវការការជួយបន្តិចបន្តួចពីអ្នកទាំងអស់គ្នា! អត់បង្ខំទេណាតាមទឹកចិត្ត»៕