ទើបតែភ្ជាប់ពាក្យហើយមិនបានប៉ុន្មាន ឥឡូវ Kimberly ទម្លាយរឿងថ្ងៃរៀបការហើយ

កាលពីថ្មីៗកន្លងទៅនេះ ការភ្ជាប់ពាក្យសុំរៀបការយ៉ាងផ្អែមល្ហែម នៅលើទៅដីប្រទេសស្វីស របស់គូស្នេហ៍តារាល្បីប្រចាំសិល្បៈថៃ Mark និង Kimberly ពិតជាធ្វើឱ្យមហាជនអ្នកគាំទ្រសប្បាយចិត្តរំជើបរំជួលមិនងាយបាត់ឡើយ ព្រោះម្នាក់ៗរង់ចាំពេលវេលានេះជាយូរមកហើយ។

យ៉ាងណាមិញ ក្នុងនោះ បន្ទាប់ពីដំណឹងភ្ជាប់ពាក្យរបស់ខ្លួនត្រូវបានចែកចាយពាសពេញហើយ សាមីខ្លួនតារាប្រុសស្រីទាំងគូ​ ក៏បានទម្លាយអារម្មណ៍ពិតរបស់ខ្លួនផងដែរ ជាពិសេសគឺ Kiim ហាក់រំជើបរំជួលខ្លាំងតែម្តង។

ដោយឡែក ថ្មីៗនេះ នៅក្នុងកម្មវីធីមួយ នាងក៏បានបង្ហើបឱ្យដឹងពីរឿងភ្ជាប់ពាក្យរបស់ខ្លួនម្តងទៀត តាមរយៈការសម្ភាសផងដែរ។ នាងបានឱ្យដឹងថា គ្រប់យ៉ាងវាគឺដូចជាសុបិនដូច្នោះឯង ហើយនាងក៏មិនគិតថា Mark នឹងសុំនាងរៀបការនៅប្រទេសស្វីសនោះទេ នាងគិតថាលោកប្រហែលជាសុំនៅប្រទេសថៃ ទើបពេលទៅដើរលេងនោះ នាងមិនមានគម្រោងអ្វីឡើយ ហើយក៏មិនបានយកខោអាវស្អាតៗទៅផងដែរ ដោយយកតែខោអាវណាដែលស្រួលស្លៀកទៅប៉ុណ្ណោះ។

ក្នុងនោះ ក្រោយពីត្រូវ​ Mark សុំរៀបការហើយ នាងពិតជារំភើបខ្លាំងធ្វើអ្វីមិនត្រូវ គិតតែពីយំយកៗ ហើយពេញមួយថ្ងៃគឺនាងមិនបានញ៉ាំអីឡើយ។ លើសពីនេះទៅទៀត នាងក៏បានទម្លាយរឿងថ្ងៃរៀបការហើយថា នាងមិនទាន់មានគម្រោងពិតប្រាកដនោះទេ តែក៏បាននិយាយគ្នាជាមួយ Mark ខ្លះៗហើយ ហើយរឿងដំបូងគឺត្រូវរកអាចារ្យឱ្យមើលពេលាមុនសិន ប៉ុន្តែគឺពិបាកក្នុងការណាត់អាចារ្យខ្លាំង ដូចនេះនាងប្រហែលជាមិនអាចរៀបការនៅក្នុងឆ្នាំនេះបានឡើយ ម្យ៉ាងការងារក៏ច្រើនខ្លាំងទៀតក្នុងឆ្នាំនេះ។

នាងបន្តទៀតថា រឿងរៀបការនេះ ប្រហែលជាឆ្នាំក្រោយឯណោះទើបនាងគិតម្តងទៀត ចំណែករឿងមានកូនវិញ នាងមិនទាន់បាននិយាយជាមួយ Mark នោះទេ​ ថាការហើយនឹងយកកូនប៉ុន្មាននាក់ ព្រោះនាងមានអារម្មណ៍ថានៅភ័យខ្លាចនៅឡើយ៕