ទីបំផុត Jang Nara ដាច់ចិត្តរៀបការហើយនៅវ័យ ៤១ ឆ្នាំ ជាមួយបុរសសាមញ្ញម្នាក់ មានអាយុប្អូន ៦ ឆ្នាំ

Jang Nara ជាតារាសម្តែងស្រីវ័យ ៤១ ឆ្នាំ ដែលមានកេរ្តិ៍ឈ្មោះល្បីល្បាញ និង មានរូបសម្រស់មិនប្រែប្រួលឡើយ ដោយរូបនាងនៅតែមានភាពស្រស់ស្អាត និង ក្មេងជាងវ័យដដែល។

តារាចម្រៀង និង សម្តែងស្រីមានប្រជាប្រិយភាពរូបនេះ បានចូលប្រឡូកក្នុងវិស័យសិល្បៈជាង ២ ទសវត្សរ៍មកហើយ គិតចាប់ពីឆ្នាំ ២០០១ មក ដោយចាប់ផ្តើមអាជីពដំបូងជាតារាចម្រៀងប្រចាំផលិតកម្ម S.M Entertainment ហើយបទចម្រៀងរបស់នាង ដែលទទួលបានភាពល្បីល្បាញទូទាំងប្រទេសនោះ គឺបទ «Sweet Dream»។

យ៉ាងណាមិញ នៅថ្ងៃទី ០៣ ខែមិថុនា ឆ្នាំ ២០២២ នេះ តារាសម្ដែង Jang Nara បានធ្វើឱ្យអ្នកគាំទ្រមានក្តីរំភើបចិត្តយ៉ាងខ្លាំង បន្ទាប់ពីនាងបានបង្ហោះសារលើគណនី IG របស់នាង ប្រកាសពីដំណឹងល្អថា រូបនាងបានរៀបការហើយ។ ចំពោះកូនកំលោះដែលនាងស្ម័គ្រចាប់ដៃជាគូជីវិតនោះ គឺជាបុរសសាមញ្ញម្នាក់ មានតួនាទីជាអ្នកផលិត និង ដឹកនាំវីដេអូ។

គួរឱ្យដឹងដែរថា កូនកំលោះរបស់តារាចម្រៀង និង សម្តែងស្រី Jang Nara គឺមានអាយុប្អូននាង ៦ ឆ្នាំ និង បានស្គាល់ហើយរួមការងារជាមួយគ្នាប្រមាណ ២ ឆ្នាំ។ ជាមួយគ្នានោះដែរ ពិធីរៀបការរបស់នាង និង ស្វាមីវ័យក្មេង គឺធ្វើឡើងយ៉ាងស្ងប់ស្ងាត់ ប៉ុន្តែពោរពេញដោយសុភមង្គលខ្លាំង៕