កោះរ៉ុងសន្លឹមជាដែនកោះ ដ៏ទាក់ទាញសម្រាប់អ្នកទេសចរបរទេស

កោះរ៉ុងសន្លឹមជាដែនកោះមួយ នៅមិនឆ្ងាយពីកោះរ៉ុងឡើយ កោះនេះស្ថិតនៅក្នុងភូមិកោះរ៉ុងសន្លឹម សង្កាត់កោះរ៉ុង ក្រុងព្រះសីហានុ ខេត្តព្រះសីហនុ  ពេលនេះ កោះរ៉ុងសន្លឹម បានក្លាយជា​គោល​ដៅ​ទេសចរណ៍មួយដ៏ទាក់ទាញបំផុតនៅក្នុងដែនសមុទ្រនៃព្រះរាជាណាចក្រកម្ពុជា ។​

កោះរ៉ុងសន្លឹម មានចម្ងាយពីដី​គោក ឬ ពីក្រុងព្រះសីហនុប្រវែង  ៣៨​ គីឡូម៉ែត្រ កោះនេះមានប្រជាពលរដ្ឋរស់នៅចំនួន ៥ ភូមិ ពួកគាត់ ​ប្រ​កប​មុខរបរជាអ្នកនេសាទ ។ កោះរ៉ុងសន្លឹម មាន​ផ្ទៃ​ដីទំហំ ៥ ០០០​ ហិកតា និង មានឆ្នេរខ្សាច់លាត​សន្ធឹង​ជាង ១ គីឡូម៉ែត្រ ។

បច្ចុប្បន្ន​ ភូមិ​កោះ​រុងសន្លឹម​ មាន​ភ្ញៀវ​ទេសចរ បរទេសទៅកម្សាន្តជាមធ្យមពី៥០ ទៅ ១០០នាក់ក្នុងមួយថ្ងៃ ដែលនៅទីនោះមានកន្លែងស្នាក់នៅបែបបឹងកាឡូជាង ២០ កំពុងរងចាំស្វាគមន៍ភ្ញៀវទេសចរ ។

កោះរ៉ុងសន្លឹម បានជួយ​អភិវឌ្ឍន៍ជីវភាព និង ការស់នៅ របស់ ប្រជាពលរដ្ឋក្នុង ភូមិកោះរុងសន្លឹម យ៉ាងច្រើន ការស្នាក់នៅរបស់ភ្ញៀវទេសចរនៅក្នុងភូមិកោះរុងសន្លឹមបានប្រែក្លាយទីនោះពីភូមិ នេសាទ ទៅជាភូមិទេសចរណ៍ ​មួយយ៉ាងទាក់ទាញ ។

ភ្ញៀវ​ទេស​ចរប្រមាណជា ៧០ ភាគរយ ដែលបានទៅកម្សាន្តនៅទីនោះ ពួកគាត់មានបំណងចង់យល់ដឹង និង ចង់ផ្លាស់ប្តូរ វប្បធម៌ ប្រពៃណី រស់​នៅ​ក្នុងសហគមន៍នេះដោយផ្ទាល់ ។

ការចូលរួមអភិរក្សផ្កាថ្ម ជីវះចម្រុះបាតកម្រ និង សន្តិសុខសម្រាប់ភ្ញៀវទេសចរ ជាចំណុចចម្បង ដើម្បី​ឱ្យភូមិកោះរ៉ុងនេះក្លាយជាតំបន់ទាក់ទាញភ្ញៀវទេសចរបានកាន់​តែ​ច្រើន​ឡើងជាលំដាប់  ៕

ដោយ៖សុថាត់