Tong Tong និយាយពាក្យប្លែកៗនេះដាក់ Best បន្ទាប់ពីដឹកដៃគ្នាទៅមើលបាត់ទាត់យប់មិញ

កាលពីថ្ងៃទី ១២ ខែកក្កដា ឆ្នាំ ២០២២ កន្លងទៅ កម្មវិធីប្រកួតបាត់ទាត់មិត្តភាពនៅទីក្រុងបាងកក THE MATCH BANGKOK CENTURY CUP 2022 បានអង្រួនចិត្តអ្នកទស្សនាជាច្រើនឱ្យចាប់អារម្មណ៍ ព្រោះមានក្រុមកីឡាល្បីលំដាប់ពិភពលោក បិសាចក្រហម Manchester United ប៉ះគ្នាជាមួយនឹង ហង្សក្រហម Liverpool។

ចំពោះការប្រកួតយ៉ាងស្វិតស្វាញកាលពីរាត្រីថ្ងៃទី ១២ កន្លងទៅនៅកណ្តាលទីក្រុងបាំងកកនេះដែរ ឃើញថាមានមនុស្សចូលរួមទស្សនាមិនតិចនាក់នោះទេ ស្ទើរតែគ្មានចន្លោះផ្លូវដើរតែម្តង។ ពិសេស ក្នុងនោះគេសង្កេតឃើញថាក៏មានវត្តមានតារាប្រុសស្រីជាច្រើន បានចំណាយពេលវេលាទៅទស្សនា និង គាំទ្រដោយផ្ទាល់នៅពហុកីឡាដ្ឋាននោះ។

ជាក់ស្តែង គូស្នេហ៍តារាប្រុសរូបសង្ហា Tong Tong និង Best ក៏បានកាន់ដៃគ្នាទៅមើលការប្រកួតមួយនេះ រហូតដល់ចប់ដូចគ្នាដែរ តែអ្វីដែលអ្នកគាំទ្រចាប់អារម្មណ៍ខ្លាំងបំផុតនោះ ខណៈឆ្លៀតឱកាសកាន់ដៃមិត្តស្រីទៅមើលការប្រកួតមិត្តភាពនោះ អ្នកកំលោះ Tong Tong ក៏បានបង្ហោះរូបភាពគូ និង ភ្ជាប់ជាមួយសារយ៉ាងមានអត្ថន័យមួយឃ្លាធ្វើឱ្យអ្នកគាំទ្រច្រណែនព្រាតថា ៖ «ជាអ្នកគាំទ្រ Manchester United ក៏មិនល្អស្មើមាន You ធ្វើជាសង្សារនោះដែរ»៕