អ្នកគាំទ្រសួរ Jin ហេតុអីមិនឃើញនៅកម្មវិធី J-Hope ស្រាប់តែគេតបមួយម៉ាត់ គាំងអ្នកគាំទ្រ
ដូចដែលមហាជន ជាពិសេសអ្នកគាំទ្រ BTS បានដឹងហើយកាលពីរាត្រីថ្ងៃទី ១៤ ខែកក្កដា កន្លងទៅ J-Hope សមាជិក BTS បានធ្វើកម្មវិធីជប់លៀងអបអរសាទរ និង ស្ដាប់មុនគេនូវអាល់ប៊ុមចម្រៀងទោលរបស់ខ្លួនមានចំណងជើងថា «Jack In The Box» ដែលបានចូលរួមសុទ្ធសឹងតែជាកំពូលតារាល្បីៗប្រចាំប្រទេសកូរ៉េ និង អ្នកជិតស្និទ្ធរបស់គេ។
បន្ទាប់ពីអ្នកដែលបានចូលរួមក្នុងកម្មវិធី ចែករំលែករូបភាពព្រោងព្រាតពាសពេញបណ្ដាញសង្គមហើយ គេសង្កេតឃើញថាមានសមាជិក ២ នាក់របស់ក្រុមចម្រៀង BTS ដូចជា Jin និង Suga ពុំឃើញរូបភាពនឹងគេទាល់តែសោះ។
អវត្តមានមួយនេះបានធ្វើឱ្យមានអ្នកគាំទ្រមួយចំនួនបង្ហាញការងឿយឆ្ងល់ រហូតបង្ហោះសារយ៉ាងច្រើនចូលទៅក្នុងបណ្តាញសង្គម Weverse និង Twitter ដើម្បីសាកសួរទៅកាន់ពួកគេ ហេតុអ្វីបានជាមិនឃើញគេបែបនេះ?
ជាមួយសំណួរទាំងនោះ Jin បានឆ្លើយតបវិញថា លោកក៏បាននៅក្នុងកម្មវិធីនោះដែរ ប៉ុន្តែបន្ទាប់ពីស្ដាប់ចម្រៀងទាំងអស់របស់ J-Hope រួចហើយ លោកបានទៅអង្គុយនៅឯកន្លៀតមួយដើម្បីអានរឿងនៅក្នុង Webtoon ដែលនេះហើយគឺជាមូលហេតុធ្វើឱ្យលោកពុំមានរូបភាពដើម្បីបង្ហោះនឹងគេ។
មិនតែប៉ុណ្ណោះ Jin ក៏បាននិយាយលេងសើចបន្ថែមទៀតថា ក្នុងកម្មវិធីទាំងមូលលោកស្គាល់តែ Bang PD ជាស្ថាបនិកផលិតកម្ម HYBE និង PDogg PD អ្នកនិពន្ធទំនុកច្រៀងក្នុងផលិតកម្មតែប៉ុណ្ណោះ។ គ្រាន់តែទទួលបានចម្លើយបែបនេះហើយ អ្នកគាំទ្រភាគច្រើនផ្ទុះសំណើច និង សម្ដែងការហួសចិត្តជាមួយនឹងការទទួលបានចម្លើយបែបនេះពីរូបគេ៕
