ភ្ញាក់ផ្អើល! កូនប្រុសពៅរបស់ Angelina Jolie ធំកំលោះស្តូក ជះរាងសង្ហាខ្លាំងណាស់

កំពូលតារាសម្តែងស្រីហូលីវូដ Angelina Jolie មិនត្រឹមតែមានប្រជាប្រិយភាពបោះសំឡេង ក៏ដូចជាការស្រឡាញ់គាំទ្រដោយសារសមត្ថភាពការសម្តែងនោះទេ លោកស្រីក៏ត្រូវបានជនជាច្រើនគោរពផងដែរ ចំពោះទឹកចិត្តមេត្តាការធ្វើសប្បុរសធម៌មិនចេះតិចកន្លងមក ។

បើក្រឡេកមករឿងជីវិតផ្ទាល់ខ្លួន ជាពិសេសរឿងគ្រួសារ គឺកាលពីនៅឆ្នាំ ២០១៦ កន្លងទៅនេះ Angelina បានសម្រេចចិត្តលែងលះចែកផ្លូវជាមួយស្វាមីលោក Brad Pitt ទៅហើយ ក្រោយពីបានរួមរស់ជាមួយគ្នាអស់ជិត ១២ ឆ្នាំ ដែលធ្វើឱ្យមហាជនអ្នកគាំទ្រសោកស្តាយមិនតិចនោះទេ។

ដោយឡែក មកទល់ពេលនេះកូនៗទាំង ៦ នាក់ ក៏បានស្ថិតនៅក្នុងការគ្រប់គ្រង Angelina ផងដែរ ហើយអតីតស្វាមីភរិយាទាំងពីរនេះ នៅតែមានការដោះស្រាយរឿងរ៉ាវមួយចំនួននៅតុលាការនៅឡើយ តែ Angelina នៅតែព្យាយាមរក្សាទំនាក់ទំនងរបស់ឪពុកកូនពួកគេឱ្យនៅល្អជានិច្ច ដោយមិនគិតពីរឿងដែលកំពុងចម្រូងចម្រាស់ឡើយ។

ចំណែក Angelina ផ្ទាល់ ក៏បានបំពេញតួនាទីជាម្តាយបានយ៉ាងល្អផងដែរ បើទោះជាមិនមានវត្តមានរបស់ស្វាមីទៀតក៏ដោយ គឺនាងតែងតែយកចិត្តទុកដាក់ជាមួយកូនៗខ្លាំងណាស់ ហើយមើលទៅពួកគេក៏សប្បាយចិត្តឆាប់ធំធាត់បានយ៉ាងល្អដូចគ្នា។

ជាក់ស្តែង កាលពីថ្ងៃទី ១៥ ខែសីហា ឆ្នាំ ២០២២ កន្លងទៅនេះ Angelina ត្រូវគេប្រទះឃើញកំពុងបណ្តើរកូនប្រុសពៅ Knox Jolie Pitt ទៅដើរផ្សារទិញអីវ៉ាន់តែពីរនាក់ម្តាយកូនយ៉ាងរំភើយតែម្តង។ ក្នុងនោះ Angelina ក៏ហាក់ជះសម្រស់មិនតិចដែរ លោកស្រីស្ថិតក្នុងរ៉ូបពណ៌សយ៉ាងស្រស់ស្អាត ដៃក៏កាន់ថង់អីវ៉ាន់សំពីងសំពោង ប៉ុន្តែអ្វីដែលធ្វើឱ្យគេចាប់អារម្មណ៍ខ្លាំងនោះ គឺ Knox ដែលពេលនេះមើលទៅពិតជាធំធាត់ពេញវ័យខ្លាំងមែនទែន។

ក្នុងការបង្ហាញមុខលើកនេះ Knox នៅក្នុងវ័យ​​ ១៤ ឆ្នាំ ពិតជាប្លែកខ្លាំងណាស់ ទាំងកម្ពស់កំពរ និង រូបរាង គឺមានការប្រែប្រួលច្រើនជាងមុន មើលទៅសឹងតែធំជាងម្តាយរបស់ខ្លួនទៅហើយ។ យ៉ាងណាមិញ មហាជនអ្នកគាំទ្រពិតជាភ្ញាក់ផ្អើលផងដែរ ព្រោះកាលឃើញគេលើកមុន គឺហាក់នៅតូចនៅឡើយ ហើយគេក៏សរសើរ Angelina ដូចគ្នា ដែលចិញ្ចឹមកូនបានយ៉ាងល្អបែបនេះ៕