ទោះជាមានអាយុកាលរាប់រយឆ្នាំក្តី តែប្រាសាទ គុកនគរ នៅតែមានលក្ខណៈល្អស្អាតដដែល

ប្រសិនបើយើងបានធ្វើដំណើរទៅដល់ ប្រាសាទគុកនគរនោះ យើងពិតជាមានការភ្ញាក់ផ្អើលក្រៃលែង ដោយសារតែប្រាសាទនេះបានសម្រស្រស់គួរឱ្យចង់គយគន់ ក្រៃលែង ដែលយើងមិននឹកស្មានដល់ថាប្រាសាទនេះ មានអាយុកាលរាប់សតវត្សរ៍មកហើយ តែក្បូរក្បាច់រចនា របស់ប្រាសាទ នៅមានលក្ខណៈល្អស្អាតដូចដើមដដែល ។

ប្រាសាទ គុកនគរ ស្ថិតនៅក្នុងភូមិត្រដក់ពង ឃុំពង្រ ស្រុកបារាយណ៍ មានចម្ងាយប្រមាណជា ៧៩គីឡូម៉ែត្រពីទីរួមខេត្តកំពង់ធំ តាមផ្លូវជាតិលេខ ៦ បត់ស្តាំចម្ងាយ ២ គីឡូម៉ែត្រនឹងដល់ប្រាសាទនេះ ។ ប្រាសាទគុកនគរ ត្រូវបានសាងសង់នៅលើដីរាបស្មើ មានរាងជាចតុកោណកែង ធ្វើពីថ្មបាយក្រៀម ថ្មភក់ បែរមុខទៅទិសខាងកើត និង មានកំពែងព័ទ្ធជុំវិញ ។

កំពែងរបស់ប្រាសាទមានបណ្តោយប្រវែង ៣៥ ម៉ែត្រ ពីកើតទៅលិច មានទទឹង២៥ម៉ែត្រ  គឺ ពីជើងទៅត្បូង ។ កំពែងនេះមានកម្ពស់ ២ ម៉ែត្រ និង កម្រាស់ ០,៨ ម៉ែត្រ មានក្លោងទ្វារពីរ ឬ គោបុរៈពីរ  ។ គោបុរៈខាងកើតមានកម្ពស់ ៩ ម៉ែត្រ ចែកជាបីបន្ទប់ ហើយខាងលិចមានគោបុរៈតូចមានរាងជាបួនជ្រុង ។

នៅប្រាសាទខាងកើតមានស្រះទឹកពីរ ស្រះតូចមួយមានជម្រៅ ៣ ម៉ែត្រ បណ្តោយ ៤៥ម៉ែត្រ ទទឹង ២០​ម៉ែត្រ និង ស្រះធំមានបណ្តោយ ១៦០ ម៉ែត្រ ទទឹង ៨៨ ម៉ែត្រ ហើយជម្រៅជាង ១ ម៉ែត្រ ។ ប្រាសាទនេះសាងសង់នៅសតវត្សទី ១០-១១ ក្នុងរាជព្រះបាទសូរិយាវរ្ម័នទី១ ( ១០០២-១០៥០គ. ស) ស្ថិតក្នុងរចនាបថឃ្លាំង ឧទ្ទិសចំពោះព្រះសិវៈ ៕

ដោយ៖សុថាត់ (ប្រភព មន្ទីរទេសចរណ៍ ខេត្តកំពង់ធំ)