ងិន ម៉ារ៉ាឌី ពោលបែបនេះឱ្យ ណាន វីសារ ក្រោយអស់ឱកាសដណ្តើមពាន Cambodian Idol

កាលពីរាត្រីថ្ងៃទី ២១ ខែសីហា ឆ្នាំ ២០២២ កន្លងទៅនេះ កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី ៤ បានបោះជំហានដល់វគ្គពាក់កណ្តាលផ្តាច់ព្រ័តហើយ ជាមួយការបង្ហាញសមត្ថភាពរបស់បេក្ខជនជើងខ្លាំងទាំង ៦ ចុងក្រោយ សុទ្ធតែទទួលបានការចាប់អារម្មណ៍ និង ការគាំទ្រខ្ពស់។

យ៉ាងណាមិញ ក្រោយបង្ហាញសមត្ថភាពរួច គឺមានតែបេក្ខជន ៤ រូបប៉ុណ្ណោះ មានដូចជា បេក្ខជន លីម តិចម៉េង នាង ដាវីន ថុល សុពិទិ និង ស៊ឹម ចន្ទពន្លឺ ដែលអាចមានឱកាសចូលវគ្គផ្តាច់ព្រ័ត្របាន ស្របគ្នានោះបេក្ខជន ២ រូបផ្សេងទៀត ត្រូវបានអស់ឱកាសដោយសារសំឡេងឆ្នោតរបស់មហាជនតិចជាងគេ គឺមាន ណាន វីសារ និង កញ្ញា មាស នីតា។

ទោះបីមិនបានចូលដល់វគ្គផ្តាច់ព្រ័ត្រក្តី ប៉ុន្តែបេក្ខជន ណាន វីសារ និង កញ្ញា មាស នីតា នៅតែទទួលបានការគាំទ្រ និង លើកទឹកចិត្តជាច្រើនណាស់ដែរពីមហាជន។ ជាមួយគ្នានឹងការលើកទឹកចិត្តនេះដែរ បើងាកទៅមើល ណាន វីសារ វិញ គេបានកត់សម្គាល់មានការលើកទឹកចិត្តដោយផ្ទាល់ពីកញ្ញា ងិន ម៉ារ៉ាឌី ដែលជា Miss Universe Cambodia 2021 ផងដែរ ជាមួយការពោលពាក្យយ៉ាងកក់ក្តៅ និង មានន័យបំផុត។

កញ្ញា ងិន ម៉ារ៉ាឌី បានពោលដល់ ណាន វីសារ ដូច្នេះថា ៖ «បង វីសារ មកដល់វគ្គនេះ គឺអស្ចារ្យណាស់ ហើយយប់មិញធ្វើបានល្អខ្លាំងជាងសប្តាហ៍មុនៗទៀត ប្អូនសូមជូនពរបងឱ្យជោគជ័យលើវិថីមួយនេះ»៕