អែនជែលឡា សំងំរស់នៅស្ងប់ស្ងាត់ជាមួយស្វាមីកន្លះឆ្នាំ ទើបថ្មីៗនេះត្រឡប់មកសម្រុកលើសិល្បៈវិញប៉ះ សុគន្ធ ថេរ៉ាយុ ជាដៃគូចាស់

បើគិតមកដល់នេះ រយៈពេលជិតកន្លះឆ្នាំមកហើយ ដែលតារាចម្រៀងស្រី អ្នកនាង អែនជែលឡា បានដឹកដៃកូនកំលោះអ្នកក្រៅសិល្បៈរៀបការកាលពី ២៧ ខែឧសភា ឆ្នាំ ២០២៤ កន្លង។

ក្នុងនោះ ក្រោយពីរៀបការ អ្នកគាំទ្រក៏បានសង្កេតឃើញថា វត្តមានរបស់តារាចម្រៀងស្រីរូបនេះ ហាក់ស្ងប់ស្ងាត់ជាថ្មី ដោយអ្នកនាង អែនជែលឡា មិនសូវបង្ហាញវត្តមានក្នុងកម្មវិធីប្រគំតន្ត្រី និង កម្សាន្តតាមបណ្តាកញ្ចក់ទូរទស្សន៍ ឬ បណ្តាញសង្គមនានានោះឡើយ។ ជាក់ស្តែង សូម្បីតែបណ្តាញសង្គមហ្វេសប៊ុករបស់អ្នកនាង ក៏ពុំសូវបង្ហាញពីជីវិតឯកជនដូចគ្នាដែរ។

ដោយឡែក ថ្មីៗនេះ អ្នកគាំទ្រហាក់រំភើបចិត្តជាថ្មី ក្រោយស្ងប់ស្ងាត់អស់មួយរយៈធំក្រោយរៀបការហើយនោះ អ្នកនាង អែនជែលឡា បានបង្ហាញវត្តមានជាថ្មីហើយ ក្នុងការចេញច្រៀងតាមបណ្តាកម្មវិធីនានា។ លើសពីនោះ អ្វីដែលកាន់តែចាប់អារម្មណ៍ ការវិលត្រឡប់មកវិញជាថ្មីនេះដែរ អ្នកនាង អែនជែលឡា បានចាប់ដៃគូច្រៀងជាមួយនឹងដៃគូចាស់ គឺលោក សុគន្ធ ថេរ៉ាយុ ទៀតផង៕