ជានិស្សិតឆ្នាំ ២ ទូច វរលក្ខណ៍ មានមហិច្ឆតាខ្ពស់ហក់ចូលប្រកួត Miss Grand Cambodia លើកដំបូង ដើម្បីចាប់ក្តីស្រមៃ
មកដល់ពេលនេះ កម្មវិធីប្រកួតសម្រស់ Miss Grand Cambodia បានបើកដំណើរការ និង បង្ហាញមុខបេក្ខភាពបវរកញ្ញានីមួយៗ ដើម្បីត្រៀមរៀបចំប្រកួតប្រជែងដណ្ដើមយកជ័យលាភីគ្រងមកុដ Miss Grand Cambodia ប្រចាំឆ្នាំ ២០២៣ នេះហើយ។
ស្របពេលកំពុងដំណើរការប្រកួតប្រជែងនេះដែរ មហាជនកំពុងសង្កេតចាប់អារម្មណ៍មើលលើបេក្ខភាពបវរកញ្ញានីមួយៗ ដែលសុទ្ធសឹងតែមានរូបសម្រស់ស្រស់ស្អាត ព្រមទាំងមានសមត្ថភាព និង ទេពកោសល្យរៀងៗខ្លួន។
ដោយឡែក ក្នុងចំណោមបេក្ខភាពបវរកញ្ញាទាំង ២៥ រូបនេះ ក្រឡេកទៅចាប់អារម្មណ៍ចំពោះបេក្ខភាពមួយរូបឈ្មោះថា ទូច វរលក្ខណ៍ មានអាយុ ១៨ ឆ្នាំ ដែលកញ្ញាក៏ជាបេក្ខភាពមួយរូបទទួលបានការចាប់អារម្មណ៍ផងដែរ ដោយមានទាំងរូបសម្រស់ដ៏ស្រស់ស្អាត និង ចំណេះដឹង។ ពិតណាស់ កញ្ញា ទូច វរលក្ខណ៍ គឺជានិស្សិតឆ្នាំទី ២ សិក្សាជំនាញ Business Administration នៅសកលវិទ្យាល័យបញ្ញាសា្រស្ត រីឯចំណេះដឹងខាងភាសាវិញ ក្រៅពីភាសាកំណើត កញ្ញាក៏អាចប្តើប្រាស់អង់គ្លេសបាន និង ភាសាចិនតិចតួចផងដែរ។
តាមរយៈសារអេឡិចត្រូនិច បេក្ខភាព Miss Grand Cambodia ២០២៣ រូបនេះ បានបង្ហាញឆន្ទៈរបស់ខ្លួនប្រាប់ «ប្រជាប្រិយ» ឱ្យដឹងថា នាងមានក្ដីស្រមៃលើវិស័យបវរកញ្ញា ដែលការចូលរួមប្រកួតកម្មវិធី Miss Grand Cambodia ២០២៣ នេះ ជាលើកដំបូង និង ប្តេជ្ញាចិត្តធ្វើឱ្យបានល្អរំពឹងបានជ័យលាភី Top ណាមួយក្នុងការប្រកួតនេះ។
ក្នុងនោះ ទូច វរលក្ខណ៍ បានរៀបរាប់ថា ៖ «សម្រាប់ខ្ញុំ ការចូលប្រកួតក្នុងវិស័យបវរកញ្ញាហ្នឹងជាលើកដំបូង អ៊ីចឹងសម្រាប់ការតាំងចិត្តរបស់ខ្ញុំ គឺខ្ញុំប្ដេជ្ញាចិត្តថា ខ្ញុំនឹងធ្វើឱ្យអស់ពីសមត្ថភាពទាំងការដើរ ការឆ្លើយសំនួរចម្លើយ និយាយទៅខ្ញុំនឹងប្រឹងប្រែងឱ្យអស់ពីសមត្ថភាព ទោះបីជាលើកដំបូងក៏ដោយ ប៉ុន្តែខ្ញុំសង្ឃឹមថានឹងអាចទទួលបាន Top ណាមួយក៏បានដែរ»៕
