គួរឱ្យសរសើរ! ខាត់ សុឃីម បង្ហើបពីបំណងប្រាថ្នា ៣ ធំៗ និង មានពាក់ព័ន្ធវិស័យបវរកញ្ញាដែរ

ឈរជើងលើវិថីសិល្បៈរាប់ឆ្នាំមកនេះ តារាចម្រុះទេពកោសល្យ អ្នកនាង ខាត់ សុឃីម នៅតែសាយភាយភាពល្បីល្បាញរបស់ខ្លួនមិនសាបសូន្យ ដោយត្រូវបានមហាជនជាច្រើនស្រឡាញ់គាំទ្រតាមរយៈពាក្យសម្ដីកំប្លុកកំប្លែង និង ទេពកោសល្យផ្នែកសិល្បៈមិនចេះរីងស្ងួតរបស់នាង។

ក្រៅពីជោគជ័យត្រូវមហាជនទទួលស្គាល់លើវិថីសិល្បៈ បច្ចុប្បន្ន ខាត់ សុឃីម ក៏ជាអ្នកជំនួញស្រីម្នាក់ផងដែរ។ ខណៈទាំងមុខជំនួញផ្ទាល់ខ្លួន និង ការងារសិល្បៈកំពុងដំណើរការទន្ទឹមគ្នា ស្រាប់តែថ្មីៗនេះ ខាត់ សុឃីម បានបង្ហើបពីបំណងប្រាថ្នា ៣ ធំៗដែលនាងចង់សម្រេចវានៅពេលមានលទ្ធភាព។

ចំពោះបំណងប្រាថ្នាទាំង ៣ ដែលតារាស្រី ខាត់ សុឃីម បានបង្ហើបនោះក៏មានពាក់ព័ន្ធនឹងវិស័យបវរកញ្ញាផងដែរ។ ខាត់ សុឃីម បានលើកឡើងថា ៖ «បើបងមានលទ្ធភាព គឺធ្វើមុនគេ សាលារៀន សិល្បៈគ្រប់ទម្រង់ឥតគិតថ្លៃ ទី២ គឺ មណ្ឌលជួយសិល្បៈចាស់ៗ គ្មានទីពឹង ទី៣ គឺការទិញ ហ៊ុនរបស់កម្មវិធី Miss ហ្នឹងហើយ»។

អ្នកនាង ខាត់ សុឃីម បានបន្តទៀតថា ៖ «បងរាល់ថ្ងៃខំប្រឹងដើម្បីគោលដៅរបស់បង ខំក្នុងជាតិនេះ មិនចាំជាតិក្រោយទេអូន អរគុណបងប្អូនខ្លះគិតអគតិមកលើខ្ញុំ ពាក្យថា សិល្បៈខ្មែរ រស់ទាំងមិនមានតម្លៃ សូម្បីតែអ្នកខ្លះចេះតែម៉្យាង គឺវិស័យជាន់បន្លិចក៏បងនៅតែខំដែរ»៕