នៅចិន សម្រុកទិញ iPhone 14 មកលក់តដើម្បីចំណេញ មានអីលក់អត់ចេញ ចុងក្រោយដាក់លក់ឡៃឡុងតាមផ្លូវដូចបន្លែ

កាលពីខែកញ្ញា ឆ្នាំ ២០២២ កន្លងទៅនេះ ខាងក្រុមហ៊ុន Apple បានទម្លាយស៊េរីចុងក្រោយរបស់ទូរសព្ទខ្លួនហើយ ដែលនោះគឺជា iPhone 14 មានរូបរាងពណ៌សម្បុរស្អាតទំនើបប្លែកភ្នែកតែម្តង។

យ៉ាងណាមិញ​ ក្នុងប្រទេសមួយចំនួន ទូរសព្ទស៊េរីចុងក្រោយមួយនេះ មើលទៅហាក់មិនសូវទទួលបានការគាំទ្រខ្លាំង ដែលជាហេតុធ្វើឱ្យមានការប៉ះពាល់ទៅដល់អ្នកលក់នោះឯង។ ក្នុងនោះ ជាក់ស្តែងថ្មីៗនេះ អ្នកលក់ជាច្រើននៅក្នុងប្រទេសចិន គឺកំពុងតែរងការប៉ះពាល់ជាមួយនឹងការទិញលក់ទូរស័ព្ទ iPhone 14 នេះ។

ដោយមុននេះ iPhone គឺជាប្រភេទដ៏ពេញនិយមបំផុតក្នុងប្រទេសចិន គឺឱ្យតែមានការចេញស៊េរីថ្មី តម្រូវការរបស់អ្នកទិញគឺខ្ពស់ខ្លាំងណាស់ រហូតដល់អ្នកខ្លះសុខចិត្តចំណាយលើសតម្លៃដើម ដើម្បីឱ្យបានកាន់មុនគេទៀតផង។ ហេតុនេះហើយ បានជាធ្វើឱ្យអ្នកលក់មួយចំនួនហ៊ានចំណាយដើមទិញទូរស័ព្ទស៊េរីចុងក្រោយទាំងនេះទុកច្រើនណាស់ ដើម្បីលក់តទៀត ព្រោះតែចង់បានចំណេញច្រើននោះឯង។

យ៉ាងណាមិញ សម្រាប់ iPhone 14 នេះវិញ ក្រោយពីបានចេញលក់នៅចិន គេសង្កេតថា ក្រៅពីតម្លៃលក់តមិនបានខ្ពស់ដូចពីមុនហើយ ពេលខ្លះមានទាំងការធ្លាក់ថ្លៃខ្លាំងជាងការទិញនៅក្នុងវេបសាយផ្លូវការទៀតផង។

ដោយឡែក អ្នកលក់ម្នាក់ៗហាក់ឈឺក្បាលខ្លាំង ព្រោះលក់មិនចេញ​ ថែមទាំងមានការប្រកួតប្រជែងពីទូរសព្ទម៉ាកផ្សេងៗជាច្រើន ហើយក្នុងនោះជម្រើសតែមួយ គឺដាក់លក់ឡៃឡុង ដើម្បីឱ្យបានដើមមកវិញខ្លះៗ បើទុកយូរអាចនឹងខាតជាងនេះ។ ក្នុងនោះ ​មានអ្នកលក់ជាច្រើនបានអង្គុយតម្រៀបគ្នានៅតាមដងផ្លូវនាទីក្រុង ព្រមដាក់ទូរស័ព្ទនៅនឹងមុខ អង្គុយលក់ដូចជាលក់បន្លែផ្លែឈើដូច្នោះឯង ដែលមើលទៅពិតជាគួរឱ្យហួសចិត្តមែនទែន៕