ស្ងាត់ៗ! កូនស្រីច្បង ពិធីការិនី ស៊ឹម សូលីកា ភ្ជាប់ពាក្យហើយ ចំណែកកម្មវិធីរៀបចំបានប្រណីតណាស់

មហាជនអ្នកនិយមតាមដានជីវិតឯកជនរបស់ពិធីការិនីល្បីឈ្មោះ ស៊ឹម សូលីកា ច្បាស់ជាបានជ្រាបខ្លះមកហើយថា មុននឹងសាងគ្រួសាររៀបការនឹងឯកឧត្តម អេង ឫទ្ធី ពិធីការិនីរូបនេះ ក៏ធ្លាប់មានចំណងអាពាហ៍ពិពាហ៍ និង ទទួលបានកូនស្រី ១ រូប និង ប្រុស ១ រូបផងដែរ។ មកដល់ពេលបច្ចុប្បន្ន កូនប្រុសរបស់ពិធីការិនី ស៊ឹម សូលីកា រស់នៅឯក្រៅប្រទេស រីឯកូនស្រីរស់នៅជាមួយអ្នកនាង។

ងាកទៅកាន់កូនស្រីរបស់ពិធីការិនី ស៊ឹម សូលីកា ឯនោះវិញ ក៏ត្រូវបានមហាជនចាប់ក្រសែភ្នែកមិនចាញ់អ្នកម្តាយនោះដែរ ក៏ព្រោះតែរូបសម្រស់ដ៏ស្រស់ស្អាត និង ចំណេះដឹងរបស់នាងដែលបានមកទាំងព្រម ធ្វើឱ្យម្តាយសប្បាយចិត្តយ៉ាងខ្លាំង។

ក្នុងឆ្នាំនេះ កូនស្រីរបស់អ្នកនាង ស៊ឹម សូលីកា ឈ្មោះ Sona មានជិតអាយុ ២៤ ឆ្នាំ ហើយ។ រីឯរូបសម្រស់ឯនោះវិញ ក៏ស្រស់ស្អាតមិនខុសពីអ្នកម្តាយនោះទេ ដោយមហាជនភាគច្រើនបានលើកឡើងថា កញ្ញា Sona មានមុខស្រដៀងខ្លាំងនឹងអ្នកនាង ស៊ឹម សូលីកា ជាម្តាយណាស់ មើលទៅដូចកូនភ្លោះទៀតផង។

ដោយឡែក កាលពីថ្ងៃទី ១១ ខែវិច្ឆិកា ឆ្នាំ ២០២៤ កន្លងទៅនេះ កញ្ញា Sona កូនស្រីច្បងរបស់ពិធីការិនី ស៊ឹម សូលីកា បានដឹកដៃកំលោះសង្ហាជាគូស្នេហ៍ និង ជាកូនអ្នកមានមុខមាត់ក្នុងសង្គមមួយរូបចូលរោងជ័យភ្ជាប់ពាក្យ បញ្ចប់ងារជាសង្សារក្លាយជាគូដណ្តឹងហើយ។ ក្នុងនោះ មហាជនអ្នកគាំទ្រគ្រួសារពិធីករ ស៊ឹម សូលីកា បានចូលរួមជូនពរដល់កញ្ញា Sona ជាបន្តបន្ទាប់ដែរ៕