(វីដេអូ) ពីរោះខ្លាំង! វី ឌីណែត ច្រៀងបទនគររាជលើឆាក «Beyond The Games Day» ល្ងាចមិញ ស្ដាប់ហើយព្រឺសម្បុរខ្ញាក
កាលពីថ្ងៃទី ២៨ ខែមេសា ឆ្នាំ ២០២៣ កន្លងទៅ កម្មវិធី «Beyond the Games Day» នៅឯវិមាន ឈ្នះ ឈ្នះ បានប្រព្រឹត្តទៅយ៉ាងរលូន ក្នុងគោលបំណងសាទរភាពជាម្ចាស់ផ្ទះរបស់កម្ពុជាក្នុងព្រឹត្តិការណ៍កីឡាស៊ីហ្គេម លើកទី ៣២ និង អាស៊ានប៉ារ៉ាហ្គេម លើកទី ១២ និង បង្ហាញភាសាបេះដូងសម្រាប់កម្ពុជា តាមរយៈការស្រឡាញ់គាំទ្រអត្តពលិកខ្មែរគ្រប់រូប ប្រកបដោយមោទកភាពលើសពីការប្រកួត។
ក្នុងកម្មវិធីនេះមានទាំងការប្រគំតន្រ្តី តាំងពិព័រណ៍គំនូរកុមារ គំនូរអាស៊ាន សួនបេះដូង និង ពិព័រណ៍ផលិតផល ជាដើម។ ជាពិសេសទៅទៀតនោះគឺមានការអញ្ជើញចូលរួមពីសិល្បករពីប្រទេសចំនួន ១១ មកសម្ដែង ព្រមទាំងកម្មវិធីល្បែងកម្សាន្តជាច្រើនទៀតផង។
ជាមួយគ្នានោះ នាល្ងាចមិញនេះ មិនត្រឹមតែមានកម្មវិធីដូចខាងលើនោះទេ អ្វីដែលកាន់តែពិសេសទៅទៀតនោះក៏មានការស្វាគមន៍ នៃការមកដល់នៃព្រះអគ្គិជ័យកីឡា មកដល់រាជធានីភ្នំពេញ ដោយមានការទទួលដោយផ្ទាល់ពីឯកឧត្តម ហ៊ុន ម៉ានី នៅឯវិមានឈ្នះឈ្នះផងដែរ។
ជាក់ស្ដែង បន្ទាប់ពីទទួលព្រះអគ្គិជ័យកីឡា ឯកឧត្តម ហ៊ុន ម៉ានី ព្រមទាំងសិល្បករសិល្បការិនី រួមជាមួយនឹងទស្សនិកជនច្រើនពាន់នាក់ បាននាំគ្នាគោរពទង់ជាតិនៃព្រះរាជាណាចក្រកម្ពុជា ជាមួយនឹងបទនគររាជ ដែលមានកញ្ញា វី ឌីណែត ជាអ្នកច្រៀងផ្ទាល់តែមួយរូបគត់ជាមួយនឹងក្បាលមេក្រូលើឆាកប្រគំតន្រ្តី «Beyond the Games Day»។
កញ្ញា វី ឌីណែត បានច្រៀងបានយ៉ាងពីរោះរណ្ដំ រហូតធ្វើឱ្យអ្នកស្ដាប់ ស្ដាប់ហើយព្រឺសម្បុរខ្ញាកតែម្ដង ដោយសារតែកញ្ញា មានការលើកដាក់សំឡេង បញ្ចូលអារម្មណ៍បានយ៉ាងល្អខ្លាំង។
ចង់ជ្រាបកាន់តែច្បាស់ សូមចុចទីនេះ ដើម្បីទស្សនាវីដេអូ នានាទី ទី ៤៩:២២៕
រូបភាព៖ Beyond The Games
