កូនប្រុសច្បងអតីតពិធីករ អ៊ិត សេដ្ឋា ទើបបញ្ចប់ថ្នាក់មហាវិទ្យាល័យ និង មានចិត្តស្រឡាញ់ផ្នែកនេះស្រដៀងឪពុក

បើរំឭកដល់ឈ្មោះ លោក អ៊ិត សេដ្ឋា មហាជននិយមតាមដានទស្សនាកម្មវិធីកម្សាន្តតាមកញ្ចក់ទូរទស្សន៍ច្បាស់ជាស្គាល់រូបលោកមកហើយ ដោយលោក អ៊ិត សេដ្ឋា គឺជាពិធីករល្បីល្បាញមួយរូបក្នុងប្រទេសកម្ពុជា។

ជាការពិត បើទោះលាចាកលោកតាំងពីអំឡុងខែមិថុនា ឆ្នាំ ២០១៧ ទៅហើយក្តី តែពិធីកររូបនេះ បានបន្សល់ទុកនូវស្នាដៃ និង ក្តីអាលោះអាល័យជាច្រើនដល់សិល្បករ សិល្បការិនីរួមអាជីព និង ក្រុមគ្រួសារ។

ដោយឡែក ក្រឡេកទៅមើលកូនៗរបស់លោក អ៊ិត សេដ្ឋា ឯនោះវិញ មហាជនបានដឹងហើយថា លោកបានបន្សល់ទុកកូនប្រុសស្រីចំនួន ៣ នាក់ ឱ្យនៅកំព្រារស់នៅជាមួយដូនចាស់ ដោយកាលនោះពួកគេនៅក្មេងវ័យនៅឡើយ។ ជាងនេះទៅទៀត កូនប្រុសច្បងរបស់លោកក៏ពិការជើង ត្រូវអង្គុយលើរទេះរុញ ទម្រាំបានព្យាបាល និង ល្អប្រសើរឡើងវិញបាន។

ងាកមកដល់បច្ចុប្បន្នវិញ ថ្មីៗនេះ អ្នកលេងបណ្តាញសង្គម Tik Tok បានចាប់អារម្មណ៍នឹងកូនប្រុសច្បងរបស់លោក អ៊ិត សេដ្ឋា ដែលមានឈ្មោះថា អ៊ិត មនោរម្យ បានបង្ហោះរូបភាពបង្ហាញពីការទទួលបានសញ្ញាបត្របញ្ចប់ថ្នាក់មហាវិទ្យាល័យ។ ក្នុងនោះ អ្នកគាំទ្រលោក អ៊ិត សេដ្ឋា កាលនៅមានជីវិត បានចូលរួមអបអរសាទរដល់យុវជន អ៊ិត មនោរម្យ និង បង្ហាញក្តីនឹករឭកដល់លោក អ៊ិត សេដ្ឋា ដូចគ្នាដែរ។

ក្រោយទទួលបានសញ្ញាបត្រថ្នាក់សកលវិទ្យាល័យហើយនោះ អ្នកគាំទ្រក៏បានចាប់អារម្មណ៍ដល់កូនប្រុសលោក អ៊ិត សេដ្ឋា ដែរ ដោយ អ៊ិត មនោរម្យ បានឱ្យដឹងថា លោកចង់ក្លាយទៅជាអ្នកផលិតមាតិកាមួយរូប៕

សូមចុចទីនេះ ដើម្បីទស្សនាវីដេអូ៖