ទម្លាយប្រវត្តិគ្រួសារ Abby Choi សុទ្ធតែជាអភិជនមានលុយពេញដៃ តែស្តាយនាងមិនបានរស់នៅសោយសុខដល់ចាស់

កាលពីថ្ងៃទី ២៥ ខែកុម្ភៈ ឆ្នាំ ២០២៣ កន្លងទៅនេះ តារាស្រីហុងកុង Abby Choi វ័យ ២៨ ឆ្នាំ ត្រូវបានគេប្រទះឃើញស្លាប់ ដោយសារអំពើឃាតកម្មពីសំណាក់អតីតស្វាមីរួមដៃជាមួយគ្រួសារ ដែលសាកសពរបស់នាងត្រូវបានគេបំផ្លាញខ្ទេចខ្ទីស្ទើរមិនគួរឱ្យជឿ។

ក្នុងនោះ ជនដៃដល់ទាំងគ្រួសារក៏ត្រូវបានប៉ូលិសក្រុងហុងកុងក្របួចបានគ្រប់គ្នាហើយ​ ហើយក៏កំពុងធ្វើការសាកសួរចម្លើយអំពីអំពើឃាតកម្មមួយនេះទៅតាមផ្លូវច្បាប់ផងដែរ។ យ៉ាងណាមិញ ជាមួយគ្នានេះ ព័ត៌មានអំពីគ្រួសាររបស់នាងត្រូវបានគេទម្លាយ ដោយព័ត៌មានបានឱ្យដឹងថា Abby Choi កើតនៅថ្ងៃទី ២២ មិថុនា ឆ្នាំ ១៩៩៤ ជាកូនពៅប្រចាំគ្រួសារ មានបង ៣ នាក់ ដែលសុទ្ធតែជាស្រីៗ។

គ្រួសារនាង ត្រូវបានគេដឹងថា ជាគ្រួសារមានឋានៈ និង ទ្រព្យសម្បត្តិមួយ ដែលមានមុខជំនួញជាច្រើននៅហុងកុងផ្ទាល់ ក៏ដូចជាទូទាំងប្រទេសចិន ដែលធ្វើឱ្យនាងបានរស់នៅលើគំនរលុយកាក់ មានជីវិតសម្បូរសប្បាយ មិនដែលប្រទះភាពថាលំបាកឡើយ។

ថ្វីដ្បិដតែជាអ្នកមានឋានៈពិតមែន តែគ្រួសារនាងមិនចេញមុខចេញមាត់ ឬ ទម្លាយព័ត៌មានណាមួយឱ្យមហាជនបានស្គាល់ច្បាស់ឡើយ ពោលគឺពួកគេរស់នៅបែបឯកជន មិនសូវឱ្យមានអ្នកដឹងពីជីវិតគ្រួសារប៉ុន្មាននោះទេ។ យ៉ាងណាមិញ មកទល់ពេលនេះ បំណែករាងកាយរបស់ Abby Choi នៅមិនទាន់រកឃើញគ្រប់នៅឡើយទេ ហើយមើលទៅគ្រួសាររបស់នាងពិតជាខូចចិត្តសោកស្តាយខ្លាំងណាស់ ដែលបានបាត់បង់កូនស្រី ប្អូនស្រីទៅក្នុងអំពើឃាតកម្មយ៉ាងសាហាវបែបនេះ៕