កំលោះ Big M ចេញមុខទម្លាយថាកំពុងមានអ្នកថែបេះដូង តែមិនទាន់ហានបង្ហាញទេ ខ្លាចអ្នកគាំទ្រឆាឆៅ

នៅពេលនេះតារាសម្ដែងប្រុសរូបសង្ហា Big M Krittarit កំពុងតែមានប្រជាប្រិយភាពខ្លាំងបន្ទាប់ពីប្រឡូកចូលសិល្បៈឡើងវិញ។ ក្នុងនោះ មិនត្រឹមតែមានអ្នកគាំទ្រក្នុងស្រុកថៃប៉ុណ្ណោះទេដែលស្រឡាញ់ពេញចិត្តលោក សូម្បីតែមហាជនក្រៅប្រទេសក៏មានការស្រឡញ់អ្នកកំលោះ Big M ដែរ។

ងាកមកមើលពីជីវិតឯកជនរបស់ប្រុសសង្ហារូបនេះវិញ បច្ចុប្បន្នជាតារាប្រុសម្នាក់ដែលកំពុងក្តាប់បានទីផ្សារសិល្បៈយ៉ាងច្រើនសន្ធឹកសន្ធាប់រហូតមានផលិតកម្មជាច្រើនដណ្ដើមគ្នាយកលោកទៅថតថែមទៀត។ ជាមួយនឹងភាពជោគជ័យលើវិស័យការនោះ បើនិយាយពីរឿងរ៉ាវបេះដូងប្រុសសង្ហារូបនេះក៏ស៊ីជម្ពូដែរ ដោយពេលនេះលោកកំពុងតែមើលចិត្តជាមួយនារីម្នាក់។

បើតាមការទម្លាយក្នុងបទសម្ភាសតារាប្រុស Big M បានឱ្យដឹងថា ៖ «នៅពេលនេះលោកកំពុងតែមើលចិត្តគ្នាជាមួយមនុស្សម្នាក់ តែមិនទាន់មានទំនាក់ទំនងស៊ីជម្រៅអ្វីឡើយ ត្រឹមជាមិត្តស្និទ្ធស្នាលសិន។ ក្នុងនោះលោកសុំមិនបង្ហាញឈ្មោះ និង ភិនភាគទេ ព្រោះពេលនេះនៅមើលចិត្តគ្នានៅឡើយពុំទាន់ច្បាស់លាស់ ណាមួយខ្លាចអ្នកគាំទ្រទៅឆាឆៅផង»៕