ពេលនេះ Jimmy Lin អាចកម្រើកដៃបានហើយ ក្រោយប្រកាសចូលសិល្បៈវិញឆ្នាំក្រោយ
ក្រោយពីសម្រាកព្យាបាលរបួសអស់រយៈពេលជាច្រើនខែ និង ឆ្លងកាត់ការវះកាត់អស់ជាច្រើនដង បន្ទាប់ពីជួបហេតុការណ៍គ្រោះចរាចរណ៍បង្កដោយខ្លួនឯងមក តារាសម្ដែងប្រុសតៃវ៉ាន់ Jimmy Lin ត្រូវបានមើលថែយ៉ាងយកចិត្តទុកដាក់បំផុតពីក្រុមគ្រួសារ ដោយសារតែដៃរបស់លោកមិនទាន់អាចចាប់ដៃអ្វីបាន រហូតមកដល់បច្ចុប្បន្នស្ថានភាពរបស់លោកបានវិលមកប្រសើរឡើងច្រើនហើយ។
ជាក់ស្ដែង នៅថ្ងៃទី ១៤ ខែធ្នូ ឆ្នាំ ២០២២ តារាសម្ដែងប្រុសរូបនេះ បានបង្ហោះរូបថតសន្លឹកបង្ហាញអំពីការធ្វើលំហាត់ប្រាណរបស់លោក នៅលើបណ្តាញសង្គម Instagram ផ្ទាល់ ក្នុងរូបភាពទាំងនោះ Jimmy Lin បានកំពុងហាត់ដោយប្រើកម្លាំងដៃទាញ មើលទៅកាយសម្បទារបស់លោកនៅពេលនេះ គឺអាចនិយាយបានថាមានការធូរស្បើយច្រើន ហើយចំពោះសកម្មភាពទាំងនេះពិតជាធ្វើឱ្យក្រុមអ្នកគាំទ្ររបស់លោករំភើបចិត្តជាខ្លាំង។
ដូចដែលធ្លាប់បានចុះផ្សាយ កាលពីថ្ងៃទី ០២ ខែធ្នូ ឆ្នាំ ២០២២ កន្លងទៅ បើតាមការប្រកាសពីស្ទូឌីយោផ្ទាល់របស់ Jimmy Lin បានឱ្យដឹងថា លោកនឹងបន្តការងារវិញជាផ្លូវការនៅខែកុម្ភៈ ឆ្នាំ ២០២៣ បន្ទាប់ពីបានធូរស្បើយពីរបួស និង រៀបចំផែនការវិលត្រឡប់មកសិល្បៈវិញ៕
