(វីដេអូ) អរគុណទឹកចិត្តធំធេង! ជនជាតិបរទេសមួយក្រុម ជិះយន្តហោះមកប្រមូលសំរាមក្រោមកម្ដៅថ្ងៃ នៅប្រឡាយទឹកស្អុយម្ដុំទួលពង្រ បានស្អាតភ្លឹង

ប្រិយមិត្តមួយចំនួនច្បាស់ជាបានស្គាល់យុវជនមួយក្រុម ដែលមានឈ្មោះ «និស្សិតប្លាស្ទិក» ដែលតែងតែចំណាយពេលវេលា កម្លាំងកាយចិត្ត ប្រមូលសំរាមពីប្រឡាយទឹកស្អុយ ក្នុងតំបន់នានានៅក្នុងភូមិសាស្ត្ររាជធានីភ្នំពេញ កែប្រែសភាពប្រឡាយឱ្យមានភាពប្រសើរជាងមុន រហូតធ្វើឱ្យអ្នកប្រើប្រាស់បណ្ដាញសង្គមជាច្រើន បានកោតសរសើរជាខ្លាំង។

ថ្មីៗនេះផងដែរ ក្រុមនិស្សិតប្លាស្ទិក ក៏បានធ្វើឱ្យអ្នកប្រើប្រាស់បណ្ដាញសង្គម បាននាំគ្នាផ្ទុះការ​ចែករំលែកជាថ្មី​ បន្ទាប់ពីបានបង្ហោះនូវសកម្មភាពជនជាតិបរទេសជាច្រើនរូប បាននាំគ្នាជិះយន្តហោះមកពីបណ្ដាប្រទេសផ្សេង មកចូលរួមសកម្មភាពប្រមូលសំរាមនៅប្រឡាយទឹកស្អុយ ជាមួយក្រុមនិស្សិតផ្លាស្ទិក ត្រង់ចំណុចប្រឡាយលូទួលពង្រ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ជាក់ស្ដែងកាលពីថ្ងៃទី ២១ ខែកញ្ញា ឆ្នាំ ២០២៤ មានក្រុមជនជាតិបរទេសមួយក្រុម បាននាំគ្នាប្រមូលសំរាមក្រោមកម្ដៅថ្ងៃ ក្រោមការដឹកនាំពីសំណាក់ជនជាតិបរទេសមួយរូប មានឈ្មោះ Kiwi ដែលនេះជាលើកទី ២ ហើយ ដែលលោកបានមកចូលរួមប្រមូលសំរាមនៅក្នុងប្រឡាយទឹកស្អុយ ជាមួយនឹងក្រុម និស្សិតប្លាស្ទិក បង្ហាញនូវទឹកចិត្តដ៏ប្រពៃ ក្នុងការរួមចំណែកជួយដោះស្រាយបញ្ហាបរិស្ថាន ក្នុងភូមិសាស្ត្ររាជធានីភ្នំពេញ ដែលក្នុងនោះគេក៏សង្កេតឃើញមានការចូលរួមពីសំណាក់យុវជន ក៏ដូចជាលោក Willam បេក្ខភាព Master Chef Cambodia រដូវកាលទី ៣ ផងដែរ៕

ដើម្បីជ្រាបកាន់តែច្បាស់​ សូមទស្សនាវីដេអូនៅខាងក្រោម ៖