(វីដេអូ) ជះរាងសង្ហា! ឡៅ បញ្ញា តួអង្គរាជ រឿង «ស្នេហាល្ងង់+ល្ងង់» ប្រើកែងដៃពុះផ្លែដូងតែ ២ កែង បែកខ្ចាយ
តារាសម្ដែងប្រុស និង ជា Mister Supranational Cambodia 2021 លោក ឡៅ បញ្ញា កំពុងតែក្ដោបបានប្រជាប្រិយភាពខ្លាំងក្នុងវិស័យសម្ដែងខ្សែភាពយន្តខ្មែរ ដែលលេចមុខសម្ដែងជាតួឯកប្រុសក្នុងរឿងមួយចំនួន ក្នុងនោះមានរឿង «ស្នេហាល្ងង់+ល្ងង់» របស់ Sastra Film និង មានភាពយន្តផ្សេងៗទៀត ជាពិសេសលោកកំពុងតែឆក់បានចំណាប់អារម្មណ៍ខ្លាំងពីអ្នកគាំទ្រជាមួយនឹងរូបសម្រស់ដ៏ស្រស់សង្ហា មុនមាត់មានមន្តស្នេហ៍របស់លោក។
ជាការពិតមួយរយៈចុងក្រោយនេះ តារាសម្ដែងប្រុសរូបនេះ ហាក់ទទួលបានការចាប់អារម្មណ៍ និង សរសើរខ្លាំងពីមហាជន ជាពិសេសអ្នកគាំទ្រនារីៗមិនតិចនោះទេ ដែលបានធ្លាក់ក្នុងអន្លង់ស្នេហ៍របស់លោក ដែលតែងបញ្ចេញរូបភាពបង្អួតសាច់ដុំធំៗ ជាហូរហែលើបណ្ដាញសង្គមនោះ។
ជាក់ស្ដែងថ្មីៗនេះ តារាសម្ដែង ឡៅ បញ្ញា បានធ្វើឱ្យអ្នកគាំទ្របើកភ្នែកធំៗ ក្រោយពីវីដេអូនៅក្នុងគណនី Tik Tok របស់លោកមួយបានបង្ហាញពីសកម្មភាព ដែលតារាប្រុសរូបនេះយកកែងដៃទៅពុះផ្លែដូង រហូតបែកជា ២ ព្រមទាំងបង្ហាញនូវក្បាច់គុនល្បុក្កតោ ធ្វើឱ្យអ្នកគាំទ្រជាច្រើនបានចូលទៅបញ្ចេញមតិសរសើរពីរូបលោកថាមិនត្រឹមតែសង្ហា តែលោក ឡៅ បញ្ញា ពិតជាមានកាយសម្បទាមាំមួនថែមទៀតផង។
លើសពីនោះ បើនិយាយពីអាជីព និង ជំនាញក្រៅពីជាតារាបង្ហាញម៉ូដ និង តារាសម្តែងក្នុងរង្វង់សិល្បៈ ការពិត លោក ឡៅ បញ្ញា ក៏ជាកីឡាករបាល់ទះ និង អាចលេងកីឡាបានច្រើនប្រភេទទៀតផង៕
