ធ្វើការដើរជល់មុខគ្នារាប់ឆ្នាំ ប៉ុន្តែកំពូលតារា ៣ គូនេះ មិនដែលសម្តែងប៉ះគ្នាសូម្បីម្តង
ជាការពិត តារាសម្ដែងប្រុសស្រីថៃគ្រប់រូបតែងតែឆ្លងកាត់ការសម្ដែងខ្សែភាពយន្តជាច្រើន រួមជាមួយនឹងដៃគូថ្មីៗដើម្បីទទួលបានភាពល្បីល្បាញ តែយ៉ាងណាមិញ ក៏មានតារាប្រុសស្រីមួយចំនួនមិនធ្លាប់បានសម្ដែងរួមគ្នាសោះផងដែរ បើទោះបីជាពួកគេជាតារារួមអាជីព និង ប្រឡូកក្នុងវិស័យសិល្បៈយូរឆ្នាំដូចគ្នាក៏ដោយ ។ ចង់ដឹងទេថាតារាប្រុសស្រីថៃរូបណាខ្លះ មិនធ្លាប់បានសម្ដែងរួមគ្នាសោះនោះ? តោះ!តាមដានជាមួយយើងដូចខាងក្រោម ៖
១. Nadech Kugimiya និង Bella Ranee
ប្រិយមិត្ដពិតជាធ្លាប់បានដឹងពីភាពល្បីល្បាញរបស់តារាសម្ដែងប្រុស Nadech Kugimiya និង តារាសម្ដែងស្រី Bella Ranee រួចមកហើយថា អ្នកទាំងពីរសុទ្ធតែជាកំពូលតារាសម្ដែងដ៏មានប្រជាប្រិយភាពប្រចាំប្រទេសថៃ និង ធ្លាប់បានសម្តែងក្នុងរឿងជាច្រើន ប៉ុន្តែយ៉ាងណាតារាសម្ដែងប្រុសស្រីទាំង ២ ដួងនេះ ត្រូវគេសម្គាល់ឃើញថា មិនដែលធា្លប់សម្ដែងរឿងរួមគ្នាសូម្បីតែមួយដងឡើយ ។ ជាមួយគ្នានេះមានមតិគាំទ្រជាច្រើនចង់ឃើញការសម្ដែងរបស់ពួកគេរួមគ្នាក្នុងខ្សែភាពយន្ដណាមួយនាពេលខាងមុខនេះ ។
២. Toey Pongsakorn និង Mew Nittha
ចំណែកឯតារាសម្ដែងប្រុសស្រីវ័យក្មេង ២ ដួងនេះវិញ Toey Pongsakorn និង តារាសម្ដែងស្រី Mew Nittha ក៏ត្រូវបានអ្នកគាំទ្រកត់សម្គាល់ថា តាំងពីពួកគេចូលប្រឡូកក្នុងវិស័យសិល្បៈមក ពួកគេក៏មិនដែលធ្លាប់បានសម្ដែងរួមគ្នាក្នុងខ្សែរភាពយន្តណាមួយដែរ រហូតធ្វើឱ្យអ្នកគាំទ្រទាំងអស់ចង់ឃើញការសម្ដែងរួមគ្នារបស់ពួកគេក្នុងរឿងបែបស្នេហាកំប្លែងៗ និង រ៉ូមែនទិចណាមួយនាពេលខាងមុខ ។
៣. Great Warintorn និង Jooy Warattaya
ក្រឡែកមកមើលតារាសម្ដែងជើងចាស់ Jooy Warattaya និង Great Warintorn វិញម្ដង ថ្វីដ្បិតតែ Great ធ្លាប់បានឆ្លងកាត់ការសម្ដែងក្នុងរឿងល្បីជាមួយតារាសម្ដែងស្រីជាច្រើន ប៉ុន្ដែផ្ទុយទៅវិញ Great មិនដែលសម្តែងប៉ះតារាស្រីដ៏មានសមត្ថភាព Jooy Warattaya ម្ដងណាឡើយ ។ ហេតុនេះអ្នកគាំទ្រសង្ឃឹមថាថ្ងៃណាមួយអ្នកទាំងពីរ និង ចាប់ដៃគូសម្ដែងរួមគ្នា ។
ប្រភព ៖ Thai Update
