ពិធីកររាងសង្ហា មុខស្រស់បែបកូនកាត់ ៤ រូប កំពុងឆក់បេះដូងអ្នកគាំទ្រនារីលង់ស្រឡាញ់មិនដឹងខ្លួន
បច្ចុប្បន្នមានពិធីករជាច្រើនបានរះព្រោងព្រាត និង សុទ្ធសឹងតែមានសមត្ថភាពក្នុងជំនាញនៃការនិយាយរបស់ពួកគេ ហើយមិនត្រឹមតែប៉ុណ្ណោះក៏មានពិធីករមួយចំនួនក៏ត្រូវបានទស្សនិកជនបានកត់សម្គាល់ពីទេពកោសល្យ និង រូបសម្រស់ស្រស់សង្ហារបស់គេមិនចាញ់ពិធីការិនីផងដែរ ។
ក្នុងនោះពិធីករបែបយុវវ័យ ៤ រូបដែលមកពីបណ្តាស្ថានីយទូរទស្សន៍ផ្សេងៗគ្នាមានរាងដ៏ស្រស់សង្ហា ជាពិសេសមុខមាត់ដូចទៅនឹងកូនកាត់បរទេសក៏កំពុងទទួលបានប្រជាប្រិយមិនធម្មតាដែរ ទាំងសមត្ថភាពក្នុងវិថីសិល្បៈ និង ជំនាញក្នុងការនិយាយបានច្រើនភាសា មានដូចជា ៖
១-ពិធីករ Taboi
បើរំឭកពីការចូលប្រឡូកក្នុងវិស័យសិល្បៈដំបូង ពិធីករ និង អ្នកផលិតកម្មវិធីរូបនេះត្រូវបានគេដឹងថា លោកធ្លាប់បានចូលរួមប្រកួតកម្មវិធី Freshie Boy ។ បន្ទាប់ពីបានបោះជំហានក្នុងវិថីសិល្បៈ Taboi ក៏ចាប់ផ្តើមធ្វើជាពិធីករក្នុងស្ថានីយទូរទស្សន៍ MY TV និង មានទេពកោសល្យក្នុងការផលិតដែរនោះ បច្ចុប្បន្នលោកក៏ក្លាយទៅជាផលិតករក្នុងកម្មវិធីមួយចំនួនរបស់ My Tv ផងដែរ ។ Taboi អាចនិយាយបាន ៣ ភាសា ដូចជាភាសាខ្មែរ ចិន និង អង់គ្លេស ។
២-ពិធីករ វី យ៉ារូ
បោះជំហានចូលវិថីសិល្បៈតាមរយៈការប្រឡងជាពិធីករក្នុងកម្មវិធីរបស់ស្ថានីយទូរទស្សន៍ BBC វី យ៉ារ៉ូ បានអភិវឌ្ឍន៍ពីពិធីករវិទ្យុ ក្លាយទៅជាពិធីករលើកញ្ចក់ទូរទស្សន៍ ។ បច្ចុប្បន្នមិនត្រឹមតែជាពិធីករដែលមានប្រជាប្រិយភាពនោះទេ តែលោកក៏បានចូលរួមសម្តែងខ្សែភាពយន្ត និង ធ្វើជាតំណាងផលិតផលក្រុមហ៊ុនមួយចំនួនទៀតផង ។ វី យ៉ារ៉ូ អាចនិយាយបាន ២ ភាសា ដូចជាភាសាខ្មែរ និង អង់គ្លេស ។
៣-ពិធីករ Summer
ផ្តើមចេញពីការចូលប្រឡងកម្មវិធីចម្រៀង «កំពូលតារា» កាលពីឆ្នាំ ២០១៥ ក៏ពិតមែន ប៉ុន្តែពិធីកររូបនេះទើបនឹងមានឱកាសបង្ហាញសមត្ថភាពលើវិថីសិល្បៈក្នុងឆ្នាំ ២០១៧ ដោយបានតំណែងជាពិធីករក្នុងស្ថានីយទូរទស្សន៍មួយ ។ បច្ចុប្បន្ន Summer ក៏បានគ្រងតំណែងក្នុងកម្មវិធីយុវវ័យជាច្រើនរបស់ស្ថានីយទូរទស្សន៍ My Tv និង បានចូលរួមសម្តែងខ្សែភាពយន្តជាច្រើនរួចមកហើយដែរ ។ Summer អាចនិយាយបាន ២ ភាសា ដូចជាភាសាខ្មែរ និង អង់គ្លេស ។
៤-ពិធីករ Sunny
ទស្សនិកជនដែលធ្លាប់បានទស្សនាកម្មវិធីសំណូមពរបទចម្រៀងរបស់ស្ថានីយទូរទស្សន៍ខ្សែកាប PPCTV កាលពីជិត ១០ ឆ្នាំមុន ច្បាស់ជាបានឃើញមុខពិធីករ Sunny ជាក់ជាមិនខាន ។ ក្រោយពីសាងកេរ្តិ៍ឈ្មោះនៅលើកញ្ចក់ទូរទស្សន៍នោះបានរយៈពេលជាច្រើនឆ្នាំ ពិធីកររូបនេះក៏មានឱកាសឈានចូលវិថីសិល្បៈទាំងស្រុងដោយបានចូលរួមសម្តែងក្នុងខ្សែភាពយន្ត និង បទចម្រៀងជាច្រើនផងដែរ ។ បច្ចុប្បន្នពិធីកររូបនេះ នៅតែបន្តធ្វើជាពិធីកររបស់ស្ថានីយទូរទស្សន៍ TV8HD និង ជាតំណាងផលិតផលរបស់ក្រុមហ៊ុនមួយចំនួនផងដែរ ។ Sunny អាចនិយាយបាន ៤ ភាសា ដូចជាភាសាខ្មែរ ភាសាចិន ភាសាអង់គ្លេស និង ភាសាថៃ ៕
