រចនា រ៉ាវ៉ាឌី បង្ហាញរថយន្តស៊េរីខ្ពស់ ស្វាគមន៍ខួបកំណើតអាយុ ២០ ឆ្នាំ
ជារៀងរាល់ឆ្នាំតារាសម្តែងវ័យក្មេង រចនា រ៉ាវ៉ាឌី ត្រូវបានគេកត់សម្គាល់ថាជាតារាមួយរូបដែលមិនសូវរៀបចំកម្មវិធីខួបកំណើតអញ្ចើញភ្ញៀវកិត្តិយសច្រើននោះទេ ដោយនៅក្នុងនោះគេតែងឃើញតារារាងខ្ពស់ស្រឡះរូបនេះ តែងតែរៀបចំកម្មវិធីតូច សាមញ្ញៗជួបជុំជាមួយនឹងមិត្តភក្តិស្និទ្ធស្នាល ឬ ក្រុមគ្រួសារយ៉ាងរីករាយ ។
យ៉ាងណាមិញ ទោះជាថ្ងៃកំណើតបានហួសអស់ទៅជាច្រើនថ្ងៃក៏ដោយក្តី តារាសម្តែង និង ម៉ូដែលរូបនេះ នៅតែបន្តទទួលបានកាដូ និង ការរៀបចំពញ្ញាក់អារម្មណ៍ពីមិត្តភក្តិជាច្រើន។ ក្នុងនោះគេបានឃើញគណនីហ្វេសប៊ុករបស់ រចនា រ៉ាវ៉ាឌី ផ្ទាល់បានបង្ហោះរូបស្ទើររៀងរាល់ថ្ងៃ ដែលត្រូវបានមិត្តភក្តិរៀបចំកម្មវិធីខួបកំណើតឲ្យនាង។
ជាងនេះទៅទៀត ថ្មីៗនេះ រូបភាពពីរសន្លឹកដែលនាងបានបង្ហោះនៅក្នុង Story Instagram ជាមួយនឹងរថយន្តទំនើបមួយគ្រឿងដែលគេបានដឹងថាជាកាដូថ្ងៃខួបកំណើតវ័យ ២០ ឆ្នាំនោះ បានធ្វើឲ្យមហាជនលាន់មាត់ថា «ខួបកំណើតឆ្នាំនេះ រចនា រ៉ាវ៉ាឌី ទទួលបានកាដូជាទីគាប់ចិត្ត និងក្តីស្រឡាញ់យ៉ាងច្រើនពីអ្នករាប់អាននាង»៕
