អ្នកគាំទ្រផ្ទុះការសង្ស័យ Teaser «គ្រាប់អង្ករ» ជាបទថ្មីរបស់ មាស សុខសោភា នៅក្នុងផលិតកម្មហង្សមាស (វីដេអូ)

មហាជនជាច្រើននៅតែទន្ទឹងចង់ដឹងថា មាស សុខសោភា នឹងសម្រេចចិត្តបន្ដអាជីពក្នុងផលិតកម្មមួយណា ក្រោយពីនាងចាកចេញពីទ្រនំថោន។ ថ្មីៗនេះ មានការចាប់អារម្មណ៍ជាខ្លាំងបន្ទាប់ពីបានឃើញ Teaser «គ្រាប់អង្ករ» បានបង្ហោះនៅក្នុងផេករបស់ផលិតកម្មហង្សមាស តែក្នុងនោះខាងផលិតកម្មមិនបានបញ្ជាក់ថាជារឿងប្រភេទអប់រំ ឬ ជាបទចម្រៀងថ្មីនៅឡើយទេ។

ក្រោយពីចាកចេញពីផលិតកម្មថោន មាស សុខសោភា មិនទាន់មានសកម្មភាពអ្វីថ្មីៗនៅឡើយទេក្រៅពី បទ​ចម្រៀង «ស្រណោះដៃប្តី»ដែលបានចេញនៅក្នុងផលិតកម្ម Camtrax Music ដែលគ្រប់គ្រងដោយគូស្នេហ៍របស់នាងលោក អ៊ិត ដារ៉ា ។ក្រៅពីនេះ សូម្បីតែបង្ហាញមុខនៅតាមកម្មវិធីប្រគំតន្រ្តីនានាតាមកញ្ចក់ទូរទស្សន៍ក៏មិនសូវមានវត្តមានតារាចម្រៀងសំឡេងផ្អែមរូបនេះដែរ ។ ថ្មីៗនេះ បែរជាមានការចាប់អារម្មណ៍ ក្រោយពីបានឃើញផលិតកម្មហង្សមាសបានបង្ហាញ Teaser «គ្រាប់អង្ករ» ដែលមានរយៈពេលប្រមាណជាងមួយនាទី ដោយមិនបានបញ្ជាក់ថាជាបទចម្រៀង ឬរឿងអប់រំនោះទេ ដោយគ្រាន់តែបង្ហោះសារខ្លីថា «ទស្សនាហើយ ឆ្ងល់មែនទេ? កុំភ្លេចរង់ចាំទស្សនាទាំងអស់គ្នា»។

ការលើកឡើងបែបនេះបានធ្វើឱ្យអ្នកទស្សនាជាច្រើនបាន Comment ថានេះជាបទចម្រៀងថ្មីរបស់ មាស សុខសោភា ទើបបានជាខាងផលិតកម្មមិនទាន់បញ្ចេញទុកឱ្យ Surprise។

មានការលើកឡើងពីសំណាក់មហាជនជាច្រើនបន្ថែមថា ប្រសិនបើ មាស សុខសោភា ពិតជាហក់ចូលក្នុង ផលិតកម្មយក្សនេះមែនពិតជាមិនធម្មតាទេ គឺអាចនិយាយថាប្រជុំតារាជើងខ្លាំងនៅក្នុងផលិតកម្មហង្សមាសតែម្តង ។ ចង់ដឹងច្បាស់ មានតែរង់ចាំមើលវីដេអូពេញ ពីគណនីផេកផ្លូវការរបស់ផលិតកម្មធំមួយនេះ ៕