ម៉ៃ ដាវីកា ប្រញាប់ធ្វើរឿងភ្ញាក់ផ្អើលឱ្យមិត្តសម្លាញ់ មីន ឆាលីដា មុនគេឯង (វីដេអូ)
បើនិយាយដល់ទំនាក់ទំនងក្នុងវិស័យសិល្បៈ គេសង្កេតឃើញតារាស្រីជួរមុខ ២ ដួងគឺ ម៉ៃ ដាវីកា និង មីន ឆាលីដា ស្រឡាញ់រាប់អានគ្នាជិតស្និទ្ធខ្លាំងណាស់ ដោយកន្លងមកពួកគេតែងបបួលគ្នាទៅដើរលេងលក្ខណៈបែបគូៗញឹកញាប់ ចែករំលែកស្នាមញញឹមជាមួយគ្នា បង្ហាញពីទំនាក់ទំនងយ៉ាងល្អចំពោះគ្នាទៅវិញទៅមក ។
ក្នុងនាមជាមិត្តសម្លាញ់នឹងគ្នាច្រើនឆ្នាំ កាលពីថ្ងៃទី ៦ សីហា យប់មិញ ម៉ៃ ដាវីកា បានធ្វើរឿងភ្ញាក់ផ្អើលមួយសម្រាប់ មីន ឆាលីដា មុនគេមុនឯង ដោយពញ្ញាក់អារម្មណ៍នាងក្នុងឱកាសជិតដល់ថ្ងៃខួបកំណើតគម្រប់ ២៧ ឆ្នាំ និង អញ្ជើញមិត្តភក្ដិជិតស្និទ្ធមួយចំនួនទៀត ចូលរួមអបអរនាងនៅភោជនីយដ្ឋានជប៉ុនមួយកន្លែងទៀតផង ។
ក្រៅពីវត្តមាន ម៉ៃ និង មីន ព្រមទាំងមិត្តភក្ដិផ្សេងទៀត ក្នុងនោះគេក៏ឃើញវត្តមានគូស្នេហ៍របស់ពួកគេ មានតារាប្រុស Ter Chantavit និង សេដ្ឋីកំលោះ Pupaa ក៏បានចូលរួមបង្កើនបរិកាសឱ្យកាន់តែរីករាយ ប្រកបដោយសំឡេងសើចសប្បាយ រ៉ូមែនទិកជាងមុន ៕
