ទាន់ក្តៅៗ អ៊ឹម ជីវ៉ា ឆ្លើយតបទៅ ចន ច័ន្ទលក្ខិណា វិញរឿងតារាស្រី រ៉ូស កំពុងល្បីលើហ្វេសប៊ុក

ប៉ុន្មានថ្ងៃមកនេះ នៅលើបណ្តាញសង្គមហ្វេសប៊ុកគេកត់សម្គាល់ឃើញវត្តមានតារាសម្តែងស្រីរូបស្រស់ឈ្មោះ រ៉ូស ហាក់លេចមុខលេចមាត់ខ្លាំងណាស់ បន្ទាប់ពីលោក អ៊ឹម ជីវ៉ា បង្ហោះបង្ហាញពីសកម្មភាពរបស់តារាស្រីរូបនេះជាបន្តបន្ទាប់នោះ ។

ជាក់ស្តែងដូចជាកាលពីពេលកន្លងទៅនេះ លោក អ៊ឹម ជីវ៉ា ទើបតែបង្ហាញវត្តមានតារាស្រី រ៉ូស ជាថ្មីទៀត ដោយការឱ្យតារាស្រី រ៉ូស ច្រៀងចម្រៀងមួយបទជាភាសាអង់គ្លេសមានចំណងជើងថា «my heart will go on» របស់តារាចម្រៀងល្បីឈ្មោះ Celine Dion ក្នុងកម្មវិធីមួយរបស់លោក ។ តាមរយៈការបង្ហើរសំនៀងពីតារាស្រី រ៉ូស ក្នុងបទនោះ បានធ្វើឱ្យអ្នកលេងបណ្តាញសង្គមសម្តែងអារម្មណ៍ហួសចិត្ត និង ហាក់អស់សំណើចមិនស្ទើរទេ បន្ទាប់ពីបានឮទឹកដមសំឡេងរបស់ រ៉ូស ច្រៀងបទនោះ ដែលសូម្បីតែលោក អ៊ឹម ជីវ៉ា ផ្ទាល់ក៏ហាក់ទប់សំណើចមិនចង់បានដែរ ។

ក្រោយពីវីដេអូតារាស្រី រ៉ូស ច្រៀងបទ «my heart will go on» ត្រូវបានចែកចាយនោះ ក្នុងនោះគេក៏បានឃើញអ្នកនាង ចន ច័ន្ទលក្ខិណា ប្រធានសមាគមសិល្បៈខ្មែរ បានបង្ហោះសារមួយអមជាមួយរូបភាព រ៉ស រួមទាំងពិធីករពីររូបទៀតមានលោក អ៊ឹម ជីវ៉ា និង ដៃគូនោះថា «សម្តែងឱ្យដឹងថាសម្តែង វិលវល់ពេកហើយ» ។

គ្រាន់តែអ្នកនាង ចន ច័ន្ទលក្ខិណា បង្ហោះសារនោះមិនទាន់បានប៉ុន្មានផង ស្រាប់តែលោក អ៊ឹម ជីវ៉ា បានបង្ហោះសារឆ្លើយតបវិញភ្លែតទាន់ក្តៅៗថា «មានន័យថាម៉េចអ្នកបង ចន ច័ន្ទលក្ខិណា ប្អូនអត់យល់ ???» ។ មិនត្រឹមតែបង្ហោះសារមួយនេះទេ លោក អ៊ឹម ជីវ៉ា នៅមានបង្ហោះសារជាច្រើនទៀតក្នុងន័យបញ្ឈិតបញ្ឆៀង ដោយលោកបានសរសេរថា «ត្រូវធ្វើជាមនុស្សមានចិត្តជាទឹក ទើបធ្វើឱ្យមនុស្សមានចិត្តជាភ្លើងមិនអាចដុតបំផ្លាញយើងបាន» និង សារមួយចំនួនទៀតជាដើម ។

តាមរយៈសារទាំងនេះដែរ បានធ្វើឱ្យមហាជនចាប់ផ្តើមគិតជាថ្មីពីទំនាក់ទំនងរបស់លោក អ៊ឹម ជីវ៉ា និង អ្នកនាង ចន ច័ន្ទលក្ខិណា ដែលមើលទៅហាក់ចាប់ផ្តើមរង្គោះរង្គើ និង មើលមុខគ្នាលែងចំជាថ្មីទៀតហើយ ។ យ៉ាងណាមិញ ចំពោះអ្នកនាង ចន ច័នលក្ខិណា បន្ទាប់ពីបង្ហោះសារខាងលើនោះហើយ គេមិនទាន់ឃើញតារាស្រីរូបនេះបង្ហោះសារ ឬ សកម្មភាពអ្វីផ្សេងទៀតឡើយ ៕