ម្ចាស់កម្មវិធីចង់បាន យ៉ាយ៉ា និង ណៈដេត ទៅចូលរួមជាគូម្ដងៗ ទាល់តែចំណាយខ្ទង់ជិត ៣ ម៉ឺនដុល្លារ

អាចនិយាយបានថាតារាថៃជួរមុខពីរដួង យ៉ាយ៉ា និង ណៈដេត គឺជាគូស្នេហ៍ដ៏ស័ក្ដិសម និង ល្បីល្បាញខ្លាំងណាស់នៅក្នុងសង្គមសិល្បៈថៃ ដោយរាល់ពេលដែលមានវត្តមានតារាប្រុស-ស្រីពីរដួងនេះ បណ្ដើរគ្នាទៅចូលរួមកម្មវិធីផ្សេងៗម្ដងៗ មានអ្នកគាំទ្រជាច្រើនសម្រុកទៅទស្សនាភ្លូកទឹកភ្លូកដី ។

ថ្វីដ្បិតតែរាល់ពេលមានវត្តមាន ណៈដេត និង យ៉ាយ៉ា កាន់ដៃគ្នាទៅកម្មវិធីផ្សេងៗ ធ្វើឱ្យកម្មវិធីនោះល្បីល្បាញមានអ្នកគាំទ្រចូលរួមច្រើន ប៉ុន្ដែម្ចាស់កម្មវិធីក៏ត្រូវចំណាយលុយជិតខ្ទង់លានបាតដែរ ។ ជាក់ស្ដែងបើតាមប្រភពពីសារព័ត៌មាន Thairath TV បានឱ្យដឹងថា គូស្នេហ៍ដែលជាកំពូលតារាថៃមួយគូនេះ ទទួលបានតម្លៃខ្លួនរហូតដល់ទៅ ៩ សែនបាត ដែលស្មើនឹងជិត ៣ ម៉ឺនដុល្លារសហរដ្ឋអាមេរិកឯណោះ ពេលទៅណាជាគូម្ដងៗ ។

ទោះបីជាតម្លៃខ្លួនរបស់ពួកគេទាំងពីរខ្ពស់បន្តិចមែន ប៉ុន្ដែវាស័ក្ដិសមហើយសម្រាប់ឈ្មោះជាកំពូលតារាជួរមុខលំដាប់ប្រទេសដូចជា យ៉ាយ៉ា និង ណៈដេត ៕