អបអរសាទរ លៀង ចាន់ឡា ជិតចូលរោងការ ជាមួយគូស្នេហ៍ហើយ (វីដេអូ)

ប្រិយមិត្តប្រាកដជានៅចាំ លៀង ចាន់ឡា អតីតបេក្ខនារីដ៏លេចធ្លោម្នាក់ក្នុងកម្មវិធីប្រឡងចម្រៀង X Factor Cambodia កាលពីឆ្នាំ ២០១៩ មិនខាន ដោយកញ្ញាបានធ្វើឱ្យមហាជនភ្ញាក់ផ្អើលនឹងសមត្ថភាពច្រៀង និង ជីវប្រវត្តិដ៏កម្សត់របស់នាងយ៉ាងខ្លាំង ។

ទោះបីជាមិនទទួលបានជោគជ័យពីការប្រកួតប្រជែងនោះក្តី ប៉ុន្តែដោយភាពតស៊ូ លៀង ចាន់ឡា បានក្រាញននៀលដើរឆ្ពោះលើវិថីសិល្បៈដែលនាងស្រឡាញ់ពេញចិត្តមិនរួយរាឡើយ រហូតនាងត្រូវបានគេហៅឡើងច្រៀងតាមកម្មវិធីជាបន្តបន្ទាប់ ហើយមួយរយៈមុនេះអតីតបេក្ខនារី X Factor Cambodia រូបនេះ ក៏ត្រូវបានគេហៅឱ្យសម្តែងក្នុងរឿងខ្លីមួយមានចំណងជើង «ប្រពន្ធបាយកក» ធ្វើឱ្យនាងកាន់តែទទួលបានភាពលេចធ្លោលើវិថីសិល្បៈ និង បានការគាំទ្រយ៉ាងខ្លាំង ។

ស្របពេលដែលកំពុងមានឈ្មោះសន្លឹមៗក្នុងវិថីសិល្បៈនេះ លៀង ចាន់ឡា ដែលពីមុនត្រូវបានគេស្គាល់ថាជា នារីម្នាក់ទន់ខ្សោយ និង មានជីវភាពគ្រួសារលំបាកដែលតាំងទីនៅខេត្តកំពង់ឆ្នាំងនោះ ស្រាប់តែបានបង្ហាញរឿងភ្ញាក់ផ្អើលមួយដល់មហាជន ដោយនាងបានទម្លាយថានាងមានគូស្នេហ៍ហើយ ដោយសង្សាររបស់នាងគឺជាបុរសវ័យក្មេងមានមុខមាត់ស្រស់សង្ហាឈ្មោះ សិទ្ធ ភារុន មានអាយុ ១៨ ឆ្នាំស្របាលនាងដែរ ។

យ៉ាងណាថ្មីៗនេះ បើតាមការបង្ហោះរបស់ទំព័រហ្វេសប៊ុក Win Samangka & Salon គេបានឱ្យដឹងថា ក្រោយពេលបង្ហាញមុខមាត់គូស្នេហ៍រួចហើយនោះ ពេលនេះ លៀង ចាន់ឡា កំពុងគិតពីគម្រោងចូលរោងការហើយ ដោយនាងបានដឹកដៃគូស្នេហ៍វ័យក្មេងថត Pre Wedding ។ តាមរយៈការបង្ហោះពីទំព័រហ្វេសប៊ុកនោះទៀត គេក៏បានដឹងថា មានអ្នកគាំទ្រអតីតបេក្ខនារីក្នុងកម្មវិធីប្រឡងចម្រៀង X Factor Cambodia រូបនេះជាច្រើន បានមកចូលជូនពរនាងគ្រប់គ្នាក្នុងជីវិតគូដែលនឹងខិតជិតចូលមកដល់នាពេលខាងមុខនោះ ៕