តាមពិត នារីចិនដែលអូសវ៉ាលិសយំឡាំប៉ាពេញផ្លូវថ្ងៃមុន ជាតារាសម្ដែងហាយសូរម្នាក់នៅចិន

អ្នកនិយមលេងហ្វេសប៊ុកប្រាកដជានៅចាំពីនារីជនជាតិចិនដ៏ស្រស់ស្អាតម្នាក់ដែលកាលពីថ្មីៗកន្លងទៅនោះ នាងបានដើរអូសវ៉ាលិសយំឡាំប៉ាពេញផ្លូវក្រោយចោរបានឆក់កាបូបរបស់នាង ដែលបានបង្កឱ្យមានការភ្ញាក់ផ្អើល និង មានការចែកចាយរូបភាពនាងពាសពេញបណ្តាញសង្គមហ្វេសប៊ុករហូតដល់ល្បី ។

ក្រោយពីមានការភ្ញាក់ផ្អើលហើយនោះ ស្រាប់តែថ្មីនេះមានទំព័រហ្វេសប៊ុកមួយបានទម្លាយពីជីវិតពិតរបស់នាងកាលនាងរស់នៅប្រទេសចិត្ត ដែលតាមពិតនាងគឺជាតារាសម្តែងម្នាក់មានឈ្មោះគួរសមក្នុងវិស័យកម្សាន្តស្រុកចិន ។

ទំព័រហ្វេសប៊ុកនោះបានរៀបរាប់ឱ្យដឹងដូច្នេះថា «មកមើលជីវិតស៊ីវីល័យរបស់គាត់កាលនៅប្រទេសចិនវិញ នៅចាំនារីម្នាក់នេះបានទេដែលមួយរយៈមុនយំឡាំប៉ាដោយសារតែមានចោរឆក់កាបូប និង ទូរស័ព្ទដៃរបស់គាត់ទៅបាត់ ពេលនេះគាត់មិនទាន់បានត្រឡប់ទៅប្រទេសចិនវិញទេ ល្ងាចមិញនាងខ្ញុំជិះឆ្លងកាត់ស្ថានទូតចិនបានឃើញគាត់រករត់ចូលឡានទើបចុះសួរនាំ ។ គាត់បានប្រាប់ថាគាត់ពិបាកចិត្តខ្លាំងណាស់មិនដឹងទៅវិញដោយរបៀបណាទេ គាត់បានប្រាប់បន្ថែមទៀតថានៅប្រទេសចិនគាត់ជាតារាថតរឿងមួយរូបដែរ តែដោយសារគាត់មកដើរលេងប្រទេសកម្ពុជា ត្រូវបានវង្វេង និង ត្រូវចោរឆក់កាបូបទូរស័ព្ទបាត់ទៀត ទើបមិនដឹងត្រូវទំនាក់ទំនងទៅអ្នកផ្ទះដោយវិធីណា តែមុននេះបន្តិចនាងខ្ញុំបានឱ្យគាត់ខ្ចីទូរស័ព្ទប្រើវីឆាតទំនាក់ទំនងទៅបងប្រុសជីដូនមួយគាត់ហើយ សង្ឃឹមថាថ្ងៃស្អែកនឹងមានដំណឹងល្អចំពោះគាត់ តាមការគិតរបស់នាងខ្ញុំ គាត់មិនបានបែកថ្នាំទេ ព្រោះការចងចាំគាត់នៅល្អធម្មតា គាត់នៅចាំ ID វីឆាត និង លេខទូរស័ព្ទបងប្អូននៅប្រទេសចិនច្បាស់» ។

ការទម្លាយឱ្យដឹងពីជីវិតរបស់នារីស្រស់ស្អាតជនជាតិចិនខាងលើពីសំណាក់ទំព័រហ្វេសប៊ុកមួយនោះ បានធ្វើឱ្យមហាជន ពិសេសអ្នកលេងបណ្តាញសង្គមហ្វេសប៊ុកមានការភ្ញាក់ផ្អើលយ៉ាងខ្លាំង ជាមួយនឹងការជូនពរនាងឱ្យមានសំណាងល្អ ៕