វ៉ាន់ នីឡា បង្ហើបចង់ចូលច្រៀងវិញ តែនៅស្ទាក់ស្ទើររឿងមួយ

តារាចម្រៀង វ៉ាន់ នីឡា ធ្លាប់ទទួលបានការគាំទ្រយ៉ាងច្រើនសន្ធឹកសន្ធាប់ពីសំណាក់ទស្សនិកជន ជាពិសេសមិត្តៗយុវវ័យជាច្រើនពេញចិត្តនឹងទឹកដមសំឡេងដ៏ស្រួយស្រែស ចរិតពូកែលេងសើចកំប្លុងកំប្លែងរបស់នាង តាមរយៈបទ «មនុស្សបងធុញវិលវិញបានទេ» និង បទចម្រៀងជាច្រើនទៀត ។

បើគិតមកដល់ពេលនេះ វ៉ាន់ នីឡា ហាក់ឃ្លាតឆ្ងាយពីវិស័យសិល្បៈចម្រៀងប្រមាណជា ៤ ទៅ ៥ ឆ្នាំហើយ ពោលគឺចាប់តាំងពីនាងផ្ទុះរឿងអាស្រូវស្នេហាជាមួយអតីតសង្សារចាស់មក ប៉ុន្ដែទោះបីជាបែបនេះ វត្តមាននាងក៏មិនបាត់សូន្យឈឹងពីបេះដូងទស្សនិកជនដែរ ព្រោះនាងតែងតែបង្ហាញសកម្មភាពឯកជនប្រចាំថ្ងៃតាមរយៈបណ្ដាញសង្គម ដើម្បីភ្ជាប់ទំនាក់ទំនងជាមួយអ្នកគាំទ្ររបស់ខ្លួនជារឿយៗ ។

ដោយឡែកស្រាប់តែថ្មីៗនេះ វ៉ាន់ នីឡា បានធ្វើឱ្យទស្សនិកជនចាប់អារម្មណ៍លើរូបនាងជាថ្មី បន្ទាប់ពីនាង មានចេតនាបង្ហើបថាចង់ចូលប្រឡូកសិល្បៈឡើងវិញ តែនាងហាក់នៅចង់ស្ទាបស្ទង់ចិត្តអ្នកគាំទ្រជាមុនសិន ។ វ៉ាន់ នីឡា បានលើកឡើងថា «សុំសួរមួយណា ចំណាស់ហ្នឹងហើយបើចូលច្រៀងវិញមានគេនៅគាំទ្រអត់?» ។

នេះមិនមែនជាលើកដំបូងទេដែលតារាចម្រៀងស្រីរូបស្រស់ វ៉ាន់ នីឡា ព្រលយចង់ចូលច្រៀងដើម្បីស្រង់យកប្រជាប្រិយភាពរបស់ខ្លួនពីមុនត្រឡប់មកវិញ តែនាងហាក់ដូចជានៅស្ទាក់ស្ទើរ ព្រោះខ្លាចបាត់សំឡេងគាំទ្រដូចមុន ៕