មិនទាន់ចប់ទេ! ប្អូនធម៌ ប៉ែន ចំរុង បង្ហោះសារថ្មី ហៅឈ្មោះ ប៉ែន ចំរុង ចំៗឱ្យចូលមកដោះស្រាយ

កាលពីពេលកន្លងទៅ នារីម្នាក់ឈ្មោះ លីលី ដែលបានទាក់ទងគ្នាធ្វើជាបងប្អូនធម៌ជាមួយនឹងតារាប្រុស ប៉ែន ចំរុង បានបង្ហោះសារ និង វីដេអូបង្ហាញទៅមហាជនអ្នកគាំទ្រថា នាងលែងមានទំនាក់ទំនងអ្វីនឹងតារាសម្តែង ប៉ែន ចំរុង ទៀតហើយ ។

ពាក់ព័ន្ធនឹងការលើកឡើងនេះដែរ មានមហាជនជាច្រើនមានចម្ងល់ និង សង្ស័យយ៉ាងខ្លាំងថា តើមូលហេតុអ្វីបានជាមានរឿងរ៉ាវរហូតដល់នារីរូបនោះបានបង្ហោះសារ និង ភ្ជាប់រូបភាព ប៉ែន ចំរុង ដោយសរសេរថា «គ្មានទៀតទេពាក្យថាបងប្អូន គ្រប់យ៉ាងគ្រាន់ជាអតីត! ឆ្អែតខ្លាំង» ។

យ៉ាងណាមិញ ទោះជាមិនមានការឆ្លើយតបពី ប៉ែន ចំរុង ក៏ពិតមែន ប៉ុន្តែបញ្ហាខាងលើនេះហាក់នៅតែបន្តឆេះងំឡើង ក៏ព្រោះតែអតីតប្អូនធម៌ស្រីរូបនោះ ក៏បានបង្ហោះសារជាបន្តបន្ទាប់ ព្រមទាំងបញ្ជាក់ឈ្មោះ ប៉ែន ចំរុង ច្បាស់ៗថា «នាងចង់ជួបលោក ប៉ែន ចំរុង ដោយផ្ទាល់ដើម្បីដោះស្រាយបញ្ហាមួយចំនួន ប៉ុន្តែលោក ប៉ែន ចំរុង ណាត់នាងហើយ បែរជាមិនមកតាមការណាត់ និង បិទការទាក់ទងគ្រប់បែបយ៉ាង» ។

ក្នុងការបង្ហោះសារនោះដែរ ក៏មានការផ្តល់យោបល់ពីសំណាក់អ្នកលេងបណ្តាញសង្គមហ្វេសប៊ុក និង អ្នកស្គាល់ភាគីទាំងសងខាងប្រាប់ទៅដល់នាងកុំឲ្យបើកចំហរឿងរ៉ាវឯកជនបែបនេះ តែនាងបានឆ្លើយតបវិញថា «បញ្ហា ៧ ខែហើយ មុននឹងផុសក៏បានឆាតទាក់ទង ដល់ផុសហៅជួបគ្នា ពេលមកជួប បោកគ្រាប់បែកធ្វើរាក់កំផែ ។ ហៅមករាប់រយគីឡូ ស្លូតណាស់ ទ្រាំណាស់ ជាន់ណាស់តើ» ៕