ឈុន រក្សា បេក្ខនារី Miss Universe Cambodia ចាប់ផ្តើមធ្វើឱ្យអ្នកគាំទ្រនឹកស្មានមិនដល់
ប្រិយមិត្តបានដឹងរួចមកហើយ ឆ្នាំ ២០២០ នេះគឺជាឆ្នាំទី ៤ ដែលកម្មវិធីប្រកួតសម្រស់ថ្នាក់ជាតិដ៏ធំ Miss Universe Cambodia ហើយក្នុងឆ្នាំថ្មីនេះដែរ គេកត់សម្គាល់ឃើញមានបេក្ខនារីដ៏ស្រស់ស្អាតជាច្រើនរូប បាន និង កំពុងបង្ហាញខ្លួនលើវិថីនេះ ដើម្បីប្រជែងគ្នាឈ្នះមកុដតំណាងប្រទេសកម្ពុជា ចូលរួមក្នុងកម្មវិធី Miss Universe 2020 ដែលនឹងចាប់ផ្តើមនាចុងឆ្នាំនេះ ។
ជាក់ស្តែងបន្ទាប់ពីបង្ហាញខ្លួនជាផ្លូវការ និង ការប្រកួតសន្សំពិន្ទុក្នុងវគ្គប្រកួតបឋមនៅថ្ងៃទី ១២ ខែវិច្ឆិកា ឆ្នាំ ២០២០ បានចប់កាលកន្លងទៅនោះ មានបេក្ខនារីជាច្រើនរូបត្រូវបានគេចាប់អារម្មណ៍ និង មើលទៅលេចធ្លោគួរឱ្យកត់សម្គាល់ ដែលក្នុងចំណោមនោះមានបេក្ខនារីម្នាក់កំពុងគឺទទួលបានប្រជាប្រិយភាព និង ការចាប់អារម្មណ៍ខ្លាំងផងដែរពីមហាជន នោះគឺកញ្ញា ឈុន រក្សា ។
បើតាមទំព័រហ្វេសប៊ុកផេក Miss Cambodia បានបង្ហាញឱ្យដឹងថា កញ្ញា ឈុន រក្សា ដែលជាបេក្ខនារីពាក់ស្លាក MUC លេខ ៨ ពេលនេះបានអភិវឌ្ឍន៍ខ្លួនយ៉ាងខ្លាំង និង តែងតែបំពេញគ្រប់លក្ខខណ្ឌការប្រកួតបានល្អពីមួយថ្ងៃទៅមួយថ្ងៃ ហើយសូម្បីតែ Concept ដែលកម្មវិធីបានដាក់ចេញម្តងៗនោះ ក៏នាងមានភាពឆ្លាតវៃបត់បែន និង ធ្វើបានល្អផងដែរ រហូតបានធ្វើឱ្យអ្នកគាំទ្រស្រឡាំងកាំងមិនស្ទើរទេ ។
ទន្ទឹមគ្នានេះដែរ បណ្តាអ្នកគាំទ្រក៏បានភ្ញាក់ផ្អើលខ្លាំងផងដែរ ចំពោះការអភិវឌ្ឍខ្លួនរបស់បេក្ខនារីរូបនេះ ដោយបានបង្ហោះចំណាប់អារម្មណ៍ថា «ពីក្មេងស្រីម្នាក់ដែលចូលប្រកួតដោយគ្មានការចាប់អារម្មណ៍ពីបណ្តា Fan club ដូចបេក្ខនារីដទៃ ពីការធ្វើខ្លួនបែបសាមញ្ញៗ ទឹកមុខបង្ហាញចេញខ្លាចៗ តែពេលនេះនាងបានធ្វើឱ្យពួកយើងភ្ញាក់ផ្អើលជាមួយការអភិវឌ្ឍខ្លួន ដែលសឹងតែនឹកស្មានមិនដល់ជាមួយភាពក្លាហាន ការលេងស្ទីលទឹកមុខ និង ភាពតាំងចិត្តរបស់នាង ដែលនាំឱ្យមនុស្សគ្រប់គ្នាងាកមកចាប់អារម្មណ៍លើនាង និង មានFan club កើនឡើងជាបន្តបន្ទាប់ ឈុន រក្សា នាងពិតជាស័ក្តិសមជាមួយតំណែង Miss Universe Cambodia 2020 នេះ ព្រោះនាងមិនត្រឹមតែមានសម្រស់ មានស្នាមញញឹមដ៏ស្រស់ស្អាតតែប៉ុណ្ណោះទេ តែនាងមានការតាំងចិត្ត ប្តេជ្ញាចិត្ត ជាមួយការអភិវឌ្ឍខ្លួនទៅមុខពីមួយថ្ងៃទៅមួយថ្ងៃ» ៕
