តូតា លេងមួយក្បាច់នេះ ប្អូនស្រីទ្រាំលែងបាន ចេញមុខឆ្លើយតបផាំង

មហាជនអ្នកគាំទ្រដែលតែងគាំទ្រតារាសម្តែង ម៉ាក សែនសូនីតា ហៅ តូតា តាំងពីការចាប់ផ្តើមចូលប្រឡូកសិល្បរបស់នាងនោះ ប្រាកដជាធ្លាប់បានដឹងរឿងរ៉ាវមួយចំនួនមកហើយ ពីជីវិតឯកជនរបស់តារាស្រីរូបនេះ ។ ក្នុងនោះ តូតា ធ្លាប់បានប្រាប់មហាជនអ្នកគាំទ្រហើយថា នាងមានបងប្អូនតែ ៣ នាក់ ប៉ុណ្ណោះ ហើយសុទ្ធតែជាស្រី ។

យ៉ាងណាមិញ ថ្មីៗនេះ តូតា បានធ្វើឲ្យមហាជនអ្នកលេងបណ្តាញសង្គមហ្វេសប៊ុកជាច្រើនមានការភាន់ច្រឡំយ៉ាងខ្លាំងពីបងប្អូនស្រីបង្កើតរបស់នាង ដោយគេឆ្ងល់ថា «តើនាង គឺជាកូនច្បង ឬក៏ប្អូនពៅ បើនៅក្មេងស្រស់ស្អាតមុខដូចជាកូនភ្លោះយ៉ាងនេះ?» ។ សំណួរនេះដែរ ត្រូវបានលើកឡើង ព្រោះ តូតា បានបង្ហោះរូបភាពជាមួយបងប្អូនបង្កើតរបស់ខ្លួន និង ភ្ជាប់សារមួយឃ្លាថា «ច្រណែនបងស្រីណាស់ដែលមានប្អូនស្រីស្អាតចឹង» ។

ភ្លាមនោះស្រាប់តែនារីដែល តូតា បានអះអាងថាជាបងស្រីនោះបានបង្ហោះសារបដិសេធភ្លាម ធ្វើឲ្យមហាជនអ្នកលេងបណ្តាញសង្គមអស់សំណើចមិនតិចនោះទេថា «យាយពីថាសូម្បីតែទូរស័ព្ទឯង ក៏គាត់យកទៅ save លេខរបស់គាត់ដាក់ឈ្មោះថាប្អូនស្រីសំណព្វចិត្តដែរ! ហើយឥលូវមកអ៊ីចឹងៗទៀត អត់យល់ថាគាត់នុងនៅងងុយដេកដល់ណា?» ។

ជាការពិត នៅក្នុងរង្វង់សិល្បៈបានដឹងហើយថា តូតា គឺជាកូនស្រីច្បងក្នុងគ្រួសារ តែប្រសិនជាអ្នកមិនសូវបានដឹងពីជីវិតឯកជនរបស់នាងនោះទេ ប្រាកដជាយល់ច្រឡំថានាងគឺជាកូនពៅជាក់ជាមិនខាន ។ គួរឲ្យដឹងថា ប្អូនស្រីពៅរបស់តារាសម្តែងរូបនេះមានឈ្មោះក្រៅថា យ៉ាយ៉ា ហើយនាងក៏មានមុខជំនួញបើកហាងលក់គ្រឿងអលង្ការដូចជា តូតា ដូចគ្នាដែរ ៕