មហាជនឆ្ងល់! Mustache Band ត្រឡប់មកវិញជាថ្មី តែមានសមាជិក ៤ នាក់ គ្មានវត្តមាន ចេន

បើរំឮកកាលពីកំឡុងខែមេសា​ ឆ្នាំ ២០២០ កន្លងទៅ មហាជនអ្នកគាំទ្រ Mustache Band ហាក់ខកចិត្តយ៉ាងខ្លាំង ក្រោយពីសមាជិកមួយរូបនៃក្រុមចម្រៀងនេះ​គឺ ចេន បានប្រកាសរំសាយក្រុម ។ ក្នុងនោះ អ្នកគាំទ្រ និង មិត្តសិល្បករជាច្រើនមានការសោកស្តាយ ព្រមទាំងសង្ឃឹមថា សមាជិកទាំង ៥ នៃ Mustache Band អាចជួបជុំគ្នាជាថ្មីវិញ ។

យ៉ាងណាមិញ រយៈពេលជាច្រើនខែ ក្រោយប្រកាសការរំសាយហើយនោះ សមាជិក Mustache Band ក៏មិនបានបង្ហាញវត្តមានរួមគ្នាដូចមុននោះទេ ដោយគេបានសង្កេតឃើញថាតារាចម្រៀងប្រចាំក្រុម ចេន បានបង្ហាញខ្លួនក្នុងការច្រៀងចម្រៀងទោល រីឯសមាជិក ៤ នាក់ផ្សេងទៀតបានបង្ហាញវត្តមានការប្រគុំតន្ត្រីជាក្រុមរឿយៗ មានដូចជា Chivorn ( Pav ) កាន់ហ្គីតា , Billy កាន់ហ្គីតា, Manuth កាន់ស្គរ និង Piseth ( Tap )​ កាន់ Keybord ​ ។

យ៉ាងណាមិញ នៅលើផេកផ្លូវការរបស់ Mustache Band នៅព្រឹកថ្ងៃទី ០១ ខែធ្នូ ឆ្នាំ​ ២០២០ កន្លងទៅនេះ បានធ្វើឲ្យមហាជនអ្នកគាំទ្រជាច្រើនមានការភ្ញាក់ផ្អើល និង មានចម្ងល់ផងដែរ បន្ទាប់ពីរូបភាព Cover នៃផេកផ្លូវការនេះបានប្តូរ ប៉ុន្តែសមាជិកក្នុងរូបភាពនោះ មានតែចំនួន ៤ នាក់ប៉ុណ្ណោះ គឺគ្មាន ចេន នោះទេ តែទោះជារូបភាពនោះ ហាក់បានបញ្ជាក់ថាការវិលត្រលប់របស់ Mustache Band នឹងមិនមានវត្តមានរបស់ ចេន រួមគ្នាទៀតក៏ពិតមែន ប៉ុន្តែអ្នកគាំទ្រមួយចំនួនបានចូលរួមអបអរ និង រីករាយ ដែលក្រុមនេះបានត្រលប់មកកាន់វិថីសិល្បជាថ្មីវិញ ៕