តន់ ចន្ទសីម៉ា តារាចម្រៀងស្រីដំបូង បរិច្ចាគ ១០ លានរៀល ចូលរួមទិញវ៉ាក់សាំងកូវីដ ១៩

ក្រោយពីការប្រកាសដំណឹង នៃការត្រៀមថវិកាទិញវ៉ាក់សាំកូវីដ ១៩ នៅជំហានដំបូងរបស់សម្តេចតេជោ ហ៊ុន សែន កាលពីល្ងាចថ្ងៃទី ០៧ ខែវិច្ឆិកា ឆ្នាំ ២០២០ នោះ ភ្លាមៗក៏មានការចូលរួមយ៉ាងសស្រាក់សស្រាំពីសំណាក់សប្បុរសជន ក្នុងការចូលរួមបរិច្ចាគថវិកាជូនដល់រដ្ឋាភិបាល ចូលរួមក្នុងការទិញវ៉ាក់សាំងកូវីដ ១៩ ។ ក្នុងនោះគេបានឃើញ មានទាំងម្ចាស់ផលិតកម្ម និង សិល្បករសិល្បការិនីមួយចំនួនក៏បានចូលរួមចំណែកដូចគ្នា ។

ជាក់ស្តែង កាលពីយប់ថ្ងៃទី ០៧ ខែធ្នូ ឆ្នាំ ២០២០ នេះ អគ្គនាយកក្រុមហ៊ុន និង ផលិតកម្ម ហ្គាឡាក់ស៊ី ណាវ៉ាត់ត្រា លោកឧកញ៉ា ឡេង ណាវ៉ាត់ត្រា បានចូលរួមបរិច្ចាគថវិកា ១ លានដុល្លារ បន្ទាប់មកតារាចម្រៀងប្រចាំផលិតកម្មខាងលើនេះ គឺលោក ខេម ក៏បានចូលរួមបរិច្ចាគថវិកា ១០ លានរៀន ផងដែរ ។

យ៉ាងណាមិញ មកដល់ថ្ងៃទី ០៨ ខែធ្នូ ឆ្នាំ ២០២០ នេះ តារាចម្រៀងស្រីប្រចាំផលិតកម្ម ហ្គាឡាក់ស៊ី ណាវ៉ាត់ត្រា មួយរូបទៀតគឺ តន់ ចន្ទសីម៉ា ក៏បានប្រកាសនៅលើគណនី fb របស់ខ្លួនថា នឹងចូលរួមចំណែកក្នុងការបរិច្ចាគថវិកាផ្ទាល់ ១០ លានរៀល ។ នាងបានរៀបរាប់យ៉ាងរំភើបថា « នាងខ្ញុំ តន់ ចន្ទសីម៉ា ពិតជាសប្បាយចិត្តនៅពេលបានដឹងពីការប្រកាសរបស់ សម្តេចតេជោ ហ៊ុន សែន ក្នុងការទិញវ៉ាក់សាំងជូនប្រជាជនកម្ពុជា នាងខ្ញុំសូមគោរពផ្តល់ជូននូវ ថវិកា ១០ លានរៀល តាមដែលនាងខ្ញុំមានលទ្ធភាពធ្វើបាន ដើម្បីចូលរួមចំណែកក្នុងការទិញវ៉ាក់សាំងជួយដល់បងប្អូនប្រជាជនកម្ពុជា ។ សូមគោរពជូនពរពុកម៉ែបងប្អូនទទួលបាន សំណាងល្អ សុខសុវត្ថិភាព ទាំងអស់គ្នា» ៕