អ្នកគ្រូ ញឹម សុខា រំភើបទឹកភ្នែករលីងរលោង ក្រោយអ្នកនាង ទ្រី ដាណា បរិច្ចាគលុយជូន ១ ពាន់ដុល្លារ!

កាលពីពេលថ្មីៗនេះ នៅលើផេកសិល្បកកម្ពុជា ដែលលោក អ៊ឹម ជីវ៉ា បានបង្ហោះពីភាពខ្វះខាតរបស់តារាម្តែងជើងចាស់ អ្នកគ្រូ ញឹម សុខា បានរកស៊ីឈ្នួលលាងចានឲ្យគេ ដើម្បីផ្គត់ផ្គង់ជីវភាព និង ព្យាបាលជំងឺ បានធ្វើឲ្យសិល្បករមហាជនជាច្រើនមានចិត្តអាណិតអ្នកគ្រូយ៉ាងខ្លាំង។

ក្នុងនោះ បន្ទាប់ពីលោក អ៊ឹម ជីវ៉ា បានយកថវិកាពីសប្បុរសជនខ្លះជូនអ្នកគ្រូ ញឹម សុខា និង អំពាវនាវដល់មហាជនផ្តល់ជំនួយដល់អ្នកគ្រូហើយនោះ គេ៏បានឃើញថាមានសប្បុរសជន និង សិល្បករមួយចំនួនក៏បានបរិច្ចាគថវិកាជូនតារាជើងចាស់រូបនោះផងដែរ ។

តួយ៉ាង នៅយប់ថ្ងៃទី ១០ ខែធ្នូ ឆ្នាំ ២០២០ លោក អ៊ឹម ជីវ៉ា បានប្រកាសនូវដំណឹងគួរឲ្យរំភើបមួយ ក៏ព្រោះតែតារាសម្តែងជើងចាស់អ្នកគ្រូ ញឹម សុខា ទទួលបានថវិកាបរិច្ចាគពីអ្នកលក់អ៊នឡាយល្បីឈ្មោះ រាជនីចិត្តធម៌ ទ្រី ដាណា ចំនួន ១ ០០០ ដុល្លារ ។
លោក អ៊ឹម ជីវ៉ា បានឲ្យដឹងថា «ជួយស៊ែរបងប្អូន លោកស្រី ទ្រី ដាណា ជួយឧបត្ថម្ភដល់តារាជើងចាស់ថវិកាចំនួន ១ ០០០ $ ( មួយពាន់ដុល្លារ)» ។

តារាប្រុសខាងលើបានបន្ថែមយ៉ាងលម្អិតទៀតថា «នៅយប់នេះខ្ញុំបាទ អុឹម ជីវ៉ា បាននាំយកថវិការរបស់លោកស្រី ទ្រី ដាណា ចំនួន ១ ០០០ $ មកឧបត្ថម្ភដល់តារាសម្តែងជើងចាស់ អ្នកគ្រូ ញឹម សុខា ដែលមានជីវភាពក្រីក្រខ្វះខាត ដើម្បីដោះស្រាយជីវភាព ! ក្នុងពេលទទួលថវិកាអ្នកគ្រូ ញឹមសុខា មានប្រសាសន៍ទាំងអារម្មណ៍រំភើបទឹកភ្នែករលីងរលោងថា ការជួយរបស់លោកស្រីទ្រីដាណា ធ្វើអោយអ្នកគ្រូ រកពាក្យអី្វមកថ្លែងពុំបាន ។ បើទោះបីលោកស្រី ទ្រី ដាណា មិនបានមកមែន តែលោកស្រីទ្រី ដាណា បានផ្តាំផ្ញើសួរសុខទុក្ខតាមរយៈលោក អុឹម ជីវ៉ា ដល់អ្នកគ្រូ និងជូនពរអោយអ្នកគ្រូ ឆាប់ជាសះស្បើយ និងមានសុខភាពល្អ»៕