ស្ងាត់យូរ! គង់ ចាន់រដ្ឋា ដឹកដៃគូស្នេហ៍បងប្អូនភ្លោះ ចេញបទថ្មីវាយលុកទីផ្សារ

ថ្មីៗនេះតារាចម្រៀងរូបស្រស់ គង់ ចាន់រដ្ឋា បានដឹកដៃគូស្នេហ៍ជាបងប្អូនភ្លោះចេញបទចម្រៀងថ្មីមួយបទវាយលុកទីផ្សារ ក្រោយស្ងប់ស្ងាត់មួយរយៈ ដែលបទនោះក៏ កំពុងទទួលបានការគាំទ្រពីសំណាក់អ្នកគាំទ្រជាច្រើនផងដែរ ។

«មុខសញ្ញា» គឺជាបទចម្រៀងថ្មីរបស់តារាចម្រៀង គង់ ចាន់រដ្ឋា រួមជាមួយតារាចម្រៀងកូនភ្លោះគឺលោក ស៊ិន សុភ័ក្ត្រ និង លោក ស៊ិន សុភា ។ ទើបតែចេញប៉ុណ្ណោះ តែបទនេះទទួលបានការគាំទ្រខ្លាំងពីសំណាក់យុវវ័យ និង បានយកទៅរាំលេងនៅតាមបណ្តាញសង្គម Tik Tok ធ្វើឱ្យ គង់ ចាន់រដ្ឋា និង ដៃគូ Twin Boys រំភើបចិត្តជាខ្លាំង ហើយអ្នកទាំងបីរំពឹងថាមហាជននឹងកាន់តែគាំទ្របន្ថែមទៀត ក្រោយពេលចេញ​ MV ព្រោះមានការសម្រិតសម្រាំងជាពិសេសផងដែរ ។

គង់ ចាន់រដ្ឋា ក៏ជាតារាចម្រៀងដែលមានរូបសម្រស់ស្អាត និង និយមលេងខ្លួនបែបទាន់សម័យម្នាក់ដែរ ហើយបទចម្រៀងដែលទទួលបានការគាំទ្រពីសំណាក់យុវវ័យកន្លងមកនោះគឺបទ «កុំហៅខ្ញុំថាស្រីចាស់» ។ សព្វថ្ងៃនេះ គង់ ចាន់រដ្ឋា ក៏មានគូស្នេហ៍ហើយគឺលោក ស៊ិន សុភា តែអ្នកទាំងពីរមិនទាន់មានគម្រោងរៀបការឡើយដោយសាររវល់ការងាររៀងខ្លួន ៕