តារាល្បីៗ ៤ ដួង មានភ័ព្វសំណាង រៀបការភរិយាជាកូនអ្នកស្តុកស្តម្ភ កំពុងកាន់ដៃគ្នារកស៊ីបន្តយ៉ាងកាក់កប

កាលពីពេលកន្លងមក «ប្រជាប្រិយ» ធ្លាប់បានលើកយកបង្ហាញជូនមកហើយ នូវសិល្បការិនីមួយចំនួនក្នុងវិស័យសិល្ប ដែលមានភ័ព្វសំណាងខ្ពស់បានរៀបការជាមួយនឹងអ្នកមានទ្រព្យស្តុកស្តម្ភ មានមុខមានមាត់ក្នុងសង្គម និង បានប្រែក្លាយវាសនាទៅជាលោកជំទាវ និង អ្នកជំនួញផងដែរ។ យ៉ាងណាមិញ ថ្ងៃនេះយើងនឹងលើកយកតារាប្រុស ៤ ដួង ដែលមានភ័ព្វសំណាងរៀបការជាមួយនឹងភរិយាជាកូនអ្នកស្តុកស្តម្ភ និង មានមុខជំនួញផ្ទាល់ខ្លួនជាច្រើន ក្រោយរៀបការរួច ព្រមទាំងរួមរស់កសាងគ្រួសារយ៉ាងមានសុភមង្គល។

១ – តារាចម្រៀង ឆាយ វីរៈយុទ្ធ

លោក ឆាយ វីរៈយុទ្ធ ចាត់ទុកជាតារាប្រុសមួយរូបដែលមានសំណាង ដោយលោកមិនត្រឹមតែមានកេរ្តិ៍ឈ្មោះក្នុងវិស័យសិល្បតែម្យ៉ាងទេ តែតារាចម្រៀងប្រុសរូបនេះ ក៏បានជួបគូជីវិតដ៏សមប្រកបថែមទៀតផង។ គេបានដឹងថា ភរិយាលោក ឆាយ វីរៈយុទ្ធ អ្នកនាង សែ ចាន់ឌី គឺជាកូនអ្នកខេត្តកំពង់ចាម ដែលមានមុខជំនួញប្រចាំគ្រួសារក្នុងដៃ គឺរោងម៉ាស៊ីនកិនស្រូវទៀតផង។ ក្រោយរៀបការរួច លោក និង ភរិយា ក៏បានពង្រឹងមុខជំនួញរបស់ឪពុកម្តាយខាងភរិយា និង បន្តបើកមុខជំនួញបន្ថែមទៀតផ្នែកអចនលទ្រព្យផងដែរ។

២ – តារាចម្រៀង កែវ វាសនា

លោក កែវ វាសនា ក៏មានសំណាងមិនខុសមិត្តរួមទ្រនំផលិតកម្មសាន់ដេខាងលើនោះទេ ។ លោកបានរៀបការជាមួយនឹងភរិយាអ្នកនាង លឹម សុគន្ធារី ដែលជាកូនអ្នកបន្ទាយមានជ័យ ហើយភរិយារបស់លោក កែវ វាសនា ក៏ត្រូវបានដឹងថាជាកូនអ្នកមានទ្រព្យស្តុកមួយរូបក្នុងខេត្តនោះទៀតផង ។ សព្វថ្ងៃតារាចម្រៀងប្រុសរូបនេះ កំពុងពង្រឹងមុខជំនួញក្នុងដៃជាច្រើន។

៣ – តារាចម្រៀង នី រតនា

តារាចម្រៀងជំនាន់ក្រោយ លោក នី រតនា ក៏មិនខុសពីតារាចម្រៀងរៀមច្បងខាងលើប៉ុន្មាននោះទេ។ បន្ទាប់ពីចូលប្រឡូកវិស័យសិល្ប និង សាងកេរ្តិ៍ឈ្មោះមិនប៉ុន្មាន តារាចម្រៀងប្រចាំផលិតកម្មហង្សមាសរូបនេះ ក៏បានបញ្ចប់ភាពនៅលីវ និង រៀបការជាមួយភរិយាអ្នកនាង ហេង សុវណ្ណភក្តិណា ដែលជាកូនអ្នកមានជីវភាពប្រសើរមួយរូប។ បច្ចុប្បន្នលោក នី រតនា និង ភរិយាបានក្លាយជាអ្នកជំនួញជោគជ័យទាំងវ័យក្មេង។

៤. តារាសម្តែង និង បង្ហាញម៉ូដ ជុំ ស៊ីថា

អតីតតារាសម្តែង និង បង្ហាញម៉ូដ ជុំ ស៊ីថា មិនបានបង្ហាញថ្ងៃរៀបការជាសាធារណៈក៏ពិតមែន ប៉ុន្តែក្រោយពីកូនស្រីច្បងរបស់លោកមានអាយុប្រមាណជា ៨ ឆ្នាំ តារាប្រុសរូបនេះ ក៏បានបង្ហាញជីវិតឯកជនដ៏មានសុភមង្គល ជាមួយនឹងភរិយាស្ថិតនៅក្រៅរង្វង់សិល្បៈ និង ជាកូនអ្នកជំនួញផងដែរ។ បច្ចុប្បន្នលោក ជុំ ស៊ីថា និង ភរិយា បានរកស៊ីផ្នែកអចលនទ្រព្យ និង មានកូនចំនួន ៥ នាក់ ហើយ ដោយកូនទី ១ និង ទី ២ ជាកូនស្រី រីឯកូនភ្លោះ ៣ នាក់ ដែលភរិយាបានសម្រាលកាលពីថ្ងៃទី ២២ ខែធ្នូ ឆ្នាំ​ ២០២០ កន្លងទៅ មានប្រុស ២ និង ស្រី ១​៕