មិនធម្មតា! ទម្រាំបង្កើតកម្មវិធីរត់ជុំវិញប្រទេស សាយ ធ្លាប់ទទួលបានមេដាយរត់ម៉ារ៉ាតុង ១៤ គ្រឿង

រយៈពេលជិតបីខែមកហើយនៃដំណើរការកម្មវិធីរត់ដើម្បីសប្បុរសធម៌ជាមួយ សាយ ក្នុងការរៃអង្គាសថវិកាជួយកុមារៗក្នុងមន្ទីរពេទ្យកុមារអង្គរ នៅខេត្តសៀមរាប បើគិតពីថ្ងៃចាប់ផ្តើមទី ៦ ខែតុលា ឆ្នាំ ២០២០ កន្លងទៅនោះ ។ បើគិតត្រឹមថ្ងៃទី ៣១ ខែធ្នូ ឆ្នាំ ២០២០ ជាថ្ងៃបិទបញ្ចប់នូវឆ្នាំចាស់នោះ សាយ និង ក្រុមការងារ «រត់ដើម្បីសប្បុរសធម៌ជាមួយសាយ» បានរត់ទៅដល់ខេត្តកំពង់ចាមហើយ ។

បើក្រឡេកទៅការចាប់ផ្តើមនៃកម្មវិធីរត់ជុំវិញប្រទេសកម្ពុជានេះដែរ ធ្លាប់មានមហាជនអ្នកគាំទ្រជាច្រើនបានលើកសំណួរសួរថា «តើ សាយ អាចរត់បានដល់បញ្ចប់កម្មវិធីឬទេ ? តើលោកមិនខ្លាចគ្រោះថ្នាក់ទេឬ? » ។ យ៉ាងណាមិញ មុននឹងឈានដល់ការសម្រេច និង ចាប់ផ្តើមបង្កើតកម្មវិធី «រត់ដើម្បីសប្បុរសធម៌ជាមួយសាយ» សាយ ក៏ធ្លាប់បានហ្វឹកហាត់ការរត់អស់រយៈពេលប្រមាណជា ១ ឆ្នាំពេញ កាលពីឆ្នាំ ២០១៩ ដើម្បីទទួលយកបទពិសោធ ។

មិនត្រឹមតែប៉ុណ្ណោះ ក្នុងការរត់កាលពីឆ្នាំ ២០១៩ ក្នុងកម្មវិធីនានាទាំងក្នុងប្រទេស និង ក្រៅប្រទេស សាយ ទទួលបានមេដាយចំនួន ១៤ រួចមកហើយដែរ ។ ជាក់ស្តែងនៅលើគណនីហ្វេសប៊ុករបស់ សាយ បានរៀបរាប់បន្ថែមថា «កាលពីឆ្នាំមុនរត់បាន ១៤ មេដាយ ឆ្នាំនេះ គេបិទកម្មវីធីកីឡា ហើយឆ្លង់ទៅរត់នៅទីណាក៏អត់បាន បង្កើតកម្មវិធីខ្លួនឯង រត់ខ្លួនឯង ជួយកុមារកម្ពុជា» ៕