អតីតតារាចម្រៀង សៀម ស្រីណុច រំភើបខ្លាំងក្រោយទទួលបានកាដូពិសេសមួយនេះ!

ពេលនេះដែរ អតីតតារាចម្រៀង សៀម ស្រីណុច បានសម្តែងអារម្មណ៍រំភើបជាខ្លាំង ក្រោយទទួលកាដូពិសេស ក្នុងចំណងដៃអាពាហ៍ពិពាហ៍ នោះគឺ កូនទីពីររបស់ខ្លួនដែលបានទន្ទឹងអស់រយៈពេលជាង ៩ ខែមកហើយនោះ។ អ្វីដែលចាប់អារម្មណ៍ ទើបនឹងសម្រាលក៏ពិតមែនតែ កូនប្រុសរបស់ សៀម ស្រីណុច មានមុខមាត់គួរឱ្យក្នាញ់ និង មានសុខភាពល្អណាស់។

ការទទួលសមាជិកថ្មីនៅក្នុងឆ្នាំ ២០២១ នេះ បានធ្វើឱ្យក្រុមគ្រួសារតូចរបស់ សៀម ស្រីណុច កាន់តែមានក្តីសុខ និង ភាពកក់ក្តៅជាខ្លាំង ព្រោះទម្រាំសម្រេចចិត្តយកកូនទីពីរនេះ គឺមានរយៈពេលរហូតដល់ទៅ ១២ ឆ្នាំឯណោះ បន្ទាប់ពីនាងមានកូនស្រីដំបូង។

បើទោះបីជាឃ្លាតឆ្ងាយពីការងារសិល្បៈជាច្រើនឆ្នាំតែ សៀម ស្រីណុច នៅតែទទួលបានការចាប់អារម្មណ៍ពីសំណាក់មហាជន ព្រោះកាលពីជាង ១០ ឆ្នាំមុន នាងក៏ធ្លាប់ជាតារាចម្រៀងដែលមានឈ្មោះបោះសំឡេង និង មានសម្រស់ស្រស់ស្អាត ក្នុងចំណោមតារាដទៃទៀត។ តួយ៉ាង ពេលនេះ សៀម ស្រីណុច មានវ័យច្រើនក៏ពិតមែន តែនាងនៅតែស្រស់ស្អាត វ័យក្មេងមិនប្រែប្រួលពីមុននោះឡើយ ហើយជារឿយៗ អតីតតារាចម្រៀងរូបនេះ តែងចែករំលែកនូវរូបភាពស្អាតៗ ជាលក្ខណៈ គ្រួសារយ៉ាងមានក្តីសុខនៅលើទឹកដីប្រទេសកាណាដាផងដែរ៕

រូបថត ៖ ហ្វេសប៊ុក