ខួបកំណើតឆ្នាំនេះ សុភ័ក្ត្រ កុសុម៉ា ប្រមូលអ្នកសិល្បៈ ជប់លៀងលើទូកយ៉ាងសប្បាយ!

កាលពីថ្ងៃទី ០៤ ខែធ្នូ ឆ្នាំ ២០២១ កន្លងទៅនេះ គឺជាថ្ងៃខួបកំណើតរបស់តារាចម្រៀង និង ពិធីការិនីពូកែវោហា សុភ័ក្ត្រ កុសុម៉ា ។ ក្នុងនោះ មហាជនអ្នកគាំទ្របានដឹងហើយថា ជារៀងរាល់ឆ្នាំតារាស្រីរូបនេះ តែងតែរៀបចំកម្មវិធីខួបកំណើតដើម្បីជួបជុំក្រុមគ្រួសារ និង មិត្តភក្តិផងដែរ។

តួយ៉ាងនៅក្នុងឆ្នាំ ២០២១ នេះ ទោះបីជាកញ្ញា សុភ័ក្ត្រ កុសុម៉ា ហាក់ស្ងប់ស្ងាត់មិនទាន់បានបង្ហោះរូបភាពក្នុងថ្ងៃកំណើតក៏ពិតមែន ប៉ុន្តែមហាជនអ្នកលេងបណ្តាញសង្គមហ្វេសប៊ុក បានឃើញសិល្បករសិល្បការិនីមួយចំនួនដែលមានដូចជា លោក ឆន សុវណ្ណរាជ អ្នកនាង កែវ ចាន់និមល និង លោក វី យ៉ារ៉ូ ជាដើម បានចូលរួមកម្មវិធីខួបកំណើតរបស់តារាស្រីសំបុរស្រអែមរូបនោះយ៉ាងរីករាយ។

លើសពីនោះ អ្វីដែលកាន់តែគួរឲ្យចាប់អារម្មណ៍ នៅក្នុងឆ្នាំនេះ សុភ័ក្ត្រ កុសុម៉ា បានរៀបចំកម្មវិធីខួបកំណើតនៅលើទូកតាមបណ្តោយមាត់ទន្លេមុខព្រះបរមរាជវាំង មើលទៅហាក់ប្លែកម្យ៉ាងពីកម្មវិធីតារាៗដទៃទៀត ៕