ផ្អែមល្ហែមណាស់! ណាខុន រៀបចំកម្មវិធីខួបកំណើតភរិយាយ៉ាងសាមញ្ញា តែមានសុភមង្គលខ្លាំង

ទោះជាមិនទាន់បានប្រាប់ពីគម្រោងរៀបការនៅឡើយរបស់តារាសម្តែងប្រុស ណាខុន ជាមួយនឹងគូស្នេហ៍ដែលមានវ័យច្រើនជាងលោកនោះក៏ពិតមែន ប៉ុន្តែការបើកចំហរពីទំនាក់ទំនងស្នេហារបស់តារាប្រុសរូបនេះ បានធ្វើឲ្យមហាជនអ្នកគាំទ្រ និង អ្នកលេងបណ្តាញសង្គមជាច្រើនមានការសរសើរ ព្រមទាំងខ្លះច្រណែនពីភាពផ្អែមល្ហែមរបស់ស្នេហាអ្នកទាំងពីរទៀតផង ។

តួយ៉ាងកាលពីថ្ងៃទី ០៧ ខែមករា ឆ្នាំ ២០២១ កន្លងទៅនេះ តារាប្រុសរូបសង្ហាខាងលើនេះ បានធ្វើឲ្យមហាជនអ្នកលេងបណ្តាញសង្គមជាច្រើនមានការចាប់អារម្មណ៍ និង ឡើងជាតិស្ករមិនតិចនោះទេ ក៏ព្រោះតែ ណាខុន បានបង្ហោះសារ និង រូបភាពផ្អែមល្ហែមជាច្រើនអបអរសាទរនៅក្នុងខួបកំណើតរបស់ភរិយារបស់ខ្លួន ដោយជូនពរពាក្យជាច្រើនដល់ប្រពន្ធសម្លាញ់របស់លោក ។

លើសពីនោះគ្រប់រូបភាព និង ពាក្យពេចន៍ គេបានសង្កេតឃើញថា លោក ណាខុន មិនត្រឹមតែស្រឡាញ់ភរិយានោះទេ កូនសូម្បីតែកូនប្រុសរបស់ភរិយាក៏ ណាខុន ស្រឡាញ់ខ្លាំងណាស់ដែរ ។ ក្នុងសារនោះ ណាខុន សរសេរថា «Happy birthday ប្រពន្ធសំឡាញ់! អរគុណប្រពន្ធសំឡាញ់ អរគុណកូនប្រុសសំណប់ សម្រាប់ការផ្តល់ក្តីស្រឡាញ់ និង ភាពកក់ក្តៅពិតប្រាកដ មនុស្សស្រីម្នាក់នេះ ដែលខ្ញុំទាំងស្រឡាញ់ទាំងគោរពបំផុតក្នុងជីវិតរបស់ខ្ញុំ» ៕