លឹម សុធាវី អាចនឹងជំនួស សេង រដ្ឋា បានទេ ក្រោយប្រកាសលាលែងតំណែង Miss Grand Cambodia?

នារសៀលថ្ងៃទី ១៩ ខែមករា ឆ្នាំ ២០២១ នេះ ស្ថាប័ន Miss Grand Cambodia បានចេញសេចក្តីប្រកាសបន្ទាន់មួយ ដោយបានអញ្ជើញកញ្ញា សេង រដ្ឋា ម្ចាស់ជ័យលាភី Miss Grand Cambodia 2020 ដើម្បីចួលរួមសម្របសម្រួលគ្នា ជុំវិញបញ្ហាដែលបានកើតឡើងកន្លងមកនេះ ។

យ៉ាងណាមិញ បន្ទាប់ពីស្ថាប័នបវរកញ្ញាខាងលើបានបង្ហោះសារអញ្ជើញជាសាធារណៈមិនទាន់បានប៉ុន្មានផង ស្រាប់តែកញ្ញា សេង រដ្ឋា បានចេញមុខបង្ហោះសារប្រកាសលើបណ្តាញហ្វេសប៊ុក ច្រានចោលមិនចូលរួមតាមការអញ្ជើញរបស់ស្ថាប័នខាងលើឡើយ ដោយកញ្ញាអះអាងថា សុខចិត្តធ្វើតាមក្រុមហ៊ុនចង់បាន ដោយដកតំណែងនាងចេញ ។

ការមិនចូលរួមដោះស្រាយ និង សុខចិត្តទាត់ចោលតំណែង Miss Grand Cambodia 2020 តាមការអញ្ជើញនារសៀលថ្ងៃទី ១៩ ខែមករា ឆ្នាំ ២០២១ នេះ ព្រោះកញ្ញា សេង រដ្ឋា មិនអាចទទួលយកបាននូវការបរិហារកេរ្តិ៍ជាសាធារណៈពីសំណាក់អ្នកគ្រប់គ្រងកម្មវិធីកាលពីកន្លងទៅលើនាង ។ នេះបើតាមការអះអាងរបស់កញ្ញានៅលើហ្វេសប៊ុនមុននេះបន្តិច ។

«សុំទោសផង fan beauty pageant និង អ្នកគាំទ្រដ៏សែនល្អរបស់ខ្ញុំ សេង រដ្ឋា ខ្ញុំពិតជាមិនអាចទទួលយកបាននៅអ្វីដែរអ្នកគ្រប់គ្រងកម្មវិធីបានបរិហារកេរ្តិ៍ឈ្មោះរបស់ខ្ញុំនៅលើបណ្តាញសង្គម រហូតដល់មានការចុះផ្សាយព័ត៌មានជាសាធារណៈបែបនេះ ខ្ញុំនឹងធ្វើតាមអ្វីដែលអ្នកគ្រប់គ្រងកម្មវិធីបានប្រកាសជាសាធារណៈកន្លងមក (ដកតំណែង) ។ ហើយអ្វីដែលខ្ញុំធ្វើបាននៅពេលនេះ គឺចូលខ្លួនបង្ហាញវត្តមាននៅថ្ងៃសន្និសីតកាសែតតែមួយគត់ ដែលនឹងប្រព្រឹត្តឡើងដោយមានការបរិច្ឆេទ ពេលវេលាច្បាស់លាស់ណាមួយតែប៉ុណ្ណោះ ដើម្បីដកតំណែងនាងខ្ញុំ ដូចអ្វីដែលអ្នកគ្រប់គ្រងកម្មវិធីបានប្រកាសជាសាធារណៈកន្លងមក ខ្ញុំពិតជាស្រឡាញ់វិស័យមួយនេះណាស់ ទម្រាំមានថ្ងៃនេះ ទោះខ្ញុំលំបាកយ៉ាងណា ក៏ខ្ញុំនៅតែញញឹមដើម្បីអ្នកទាំងអស់គ្នា love u my Fan I like simple life» ។

មកដល់នៅត្រង់នេះ សំណួរបានចោទឡើងថា បើពេលកញ្ញា សេង រដ្ឋា សុខចិត្តដើរចេញពីតំណែង តើបវរកញ្ញាបន្ទាប់រូបណានឹងជំនួសតំណែងនាងបាន? បើតាមការសន្និដ្ឋានដំបូងពីសំណាក់មហាជនទូទៅនោះ បវរកញ្ញាបន្ទាប់អាចជាកញ្ញា លឹម សុធាវី ដែលជាជ័យលាភីរងទី ១ ក្នុងកម្មវិធី ។ ងាកទៅលោក អ៊ិន សុភិន អ្នកគ្រប់គ្រងកម្មវិធី Miss Grand Cambodia ពេលឆ្លើយឆ្លងជាមួយអ្នកគាំទ្រក្នុងការបញ្ចេញមតិលើបណ្តាញសង្គមហ្វេសប៊ុកវិញនោះ លោកបានឆ្លើយថា «តាមលេងរៀង» ដែលអាចមានន័យថា អ្នកនឹងទទួលតំណែងជំនួសនោះគឺជាជ័យលាភីរងទី ១ កញ្ញា លឹម សុធាវី ប្រាកដមែនហើយ ។

ទោះជាយ៉ាងនេះក្តី នៅមិនទាន់ផ្លូវការនៅឡើយ សម្រាប់កញ្ញា លឹម សុធាវី ដែលនឹងទទួលតំណែងបន្តពីកញ្ញា សេង រដ្ឋា ឬអត់នោះ? ដោយរង់ចាំតាមដានបន្តទៀត ជាមួយការប្រកាសជាផ្លូវការពីសំណាក់ស្ថាប័ន ។ ស្របគ្នាជាមួយការប្រកាសដើរចេញពីតំណែងរបស់កញ្ញា សេង រដ្ឋា បានធ្វើឱ្យមហាជនភ្ញាក់ផ្អើល និង សម្តែងក្តីខកចិត្តយ៉ាងខ្លាំង ហើយក្នុងនោះដែរសម្រាប់សមាភាពថ្មីដែលគេគិតថាជាកញ្ញា លឹម សុធាវី នឹងចូលជំនួសតំណែងនោះ ក៏បានធ្វើអ្នកគាំទ្រមួយចំនួនធំមិនសូវពេញចិត្តប៉ុន្មានដែរ ៕