រំឭកឡើងវិញ! James Jirayu និង Taew ចាប់ដៃគូគ្នា ៣ រឿងនេះ ល្បីល្បាញអស់ស្ទះ
បើនិយាយដល់ខ្សែភាពយន្តភាគថៃល្បីៗដែលធ្វើឱ្យមហាជនតាមដានស្ទើរតែភ្លេចបាយភ្លេចទឹកនោះ ប្រិយមិត្តច្បាស់ជាមិនភ្លេចនឹកឃើញដល់ការសម្ដែងរបស់តារាជួរមុខដែលធ្លាប់ជាដៃគូសិល្បៈដ៏ស័ក្ដិសមនឹងគ្នា គឺលោក James Jirayu និង Taew Natapohn មិនខាន ។
ជាការពិត ខ្សែភាពយន្តភាគថៃ ៣ រឿង ធ្វើឱ្យប្រុសស្អាត James និង តារាសម្ដែងស្រីជួរមុខ Taew ក្លាយជាសំណព្វចិត្តទស្សនិកជន មានអ្នកតាមដានច្រើនផុសផុល ដែលអាចជួយជំរុញឱ្យពួកគេកាន់តែមានឈ្មោះល្បីល្បាញខ្លាំងឡើង មានដូចជា ៖
១- រឿង «Neung Dao Fah Diew» គឺជារឿងដំបូងដែលតារាសម្ដែងប្រុសស្រីជួរមុខ ២ រូបនេះ មានឱកាសប៉ះគ្នា នៅឆ្នាំ ២០១៨ ហើយការចាប់ដៃគូលើកទី ១ នេះ អ្នកទាំងពីរក៏ទទួលបានការគាំទ្រច្រើនភ្លូកទឹកភ្លូកដីពីសំណាក់ទស្សនិកជន ។
២- រឿង «Game Sanaeha» ជាការសម្ដែងប៉ះគ្នាលើទី ២ រវាងប្រុសស្អាត James និង នាង Taew ហើយតាមរយៈរឿងនេះ ពួកគេក៏ត្រូវបានអ្នកគាំទ្រជំរុញឱ្យស្រឡាញ់គ្នាក្រៅឆាកផងដែរ ។
៣- រឿង «Leh Bunpakarn» ជាចំណងដៃក្នុងឆ្នាំ ២០២០ ដល់ទស្សនិកជន ដែលតារាប្រុសរូបសង្ហា James ចាប់ដៃស្រីស្រស់ Taew សម្ដែងជាតួឯកប្រុសស្រី ក្រោមសន្ទុះនៃការគាំទ្រច្រើនគួរឱ្យកត់សម្គាល់ពីមហាជន ៕
