![អបអរសាទរ! តារាចម្រៀង សាន សុខកក្កដា អាយុ ៤៣ ឆ្នាំ រៀបការជាមួយស្វាមីអាយុ ២៦ ឆ្នាំ](https://www.popular.com.kh/wp-content/uploads/2021/02/Da.jpg)
អបអរសាទរ! តារាចម្រៀង សាន សុខកក្កដា អាយុ ៤៣ ឆ្នាំ រៀបការជាមួយស្វាមីអាយុ ២៦ ឆ្នាំ
មហាជនអ្នកគាំទ្រនិយមស្តាប់បទចម្រៀងសម័យដើម និង បុរាណ ប្រាកដជាធ្លាប់បានស្គាល់មកហើយតារាចម្រៀងរៀមច្បង សាន សុខកក្កដា ដែលជាអតីតជ័យលាភីតារាចម្រៀងចំណាត់ថ្នាក់លេខ ១ ប្រចាំខេត្តព្រះសីហនុ កាលពីកំឡុងឆ្នាំ ១៩៩៥ ។ លើសពីនោះ តារាចម្រៀងរៀមច្បងរូបនេះ ក៏ជាតារាចម្រៀងស្រករអ្នកនាង ខាត់ សុឃីម ផងដែរ ។
នៅថ្ងៃទី ១៨ ខែកុម្ភៈ ឆ្នាំ ២០២១ នេះដែរ មហាជនអ្នកគាំទ្រកំពុងតែចូលរួមអបអរដល់តារាចម្រៀងរូបនេះ បានរៀបមង្គលការជាមួយនឹងស្វាមីវ័យក្មេង ក្រោយស្ពាយឈ្មោះជាម៉េម៉ាយអស់រយៈពេលជាច្រើនឆ្នាំមក ។ ទន្ទឹមនឹងការចូលរួមអបអរសាទរ មហាជនអ្នកលេងបណ្តាញសង្គមហ្វេសប៊ុក ក៏មានការចាប់អារម្មណ៍ពិធីមង្គលការរបស់តារាចម្រៀង សាន សុខកក្កដា ផងដែរ ក្រោយពីផេកសិល្បករកម្ពុជាបានបង្ហោះឲ្យដឹងថា ស្វាមីរបស់នាងមានអាយុតិចជាងនាងដល់ទៅជាង ២០ ឆ្នាំ ឯណោះ ។
ផេកសិល្បករកម្ពុជា បានរៀបរាប់ថា «នារីមានអាយុច្រើនកុំទានភ័យ ! កូនកំលោះអាយុ ២៦ ឆ្នាំ កូនក្រមុំអាយុ ៤៣ ឆ្នាំ ថ្ងៃនេះមកចូលរួមពិធីមង្គលការ អតីតតារាចំរៀងជើងចាស់ គឺអ្នកនាង សាន សុខកក្កដា ដែលបានរៀបអាពាហ៍ពិពាហ៍ ជាមួយលោក សុត វណ្ណស្មាវី ! ទោះបីខាងស្រីមានវ័យចំណាស់អាយុច្រើនជាង ២០ មែន តែក៏អាចឆាក់យកបេះដូងបុរសម្នាក់នេះចូលរោងការបានផងដែរ ។ ពិធីមង្គលការនេះ គឺអញ្ជើញភ្ញៀវចូលរួមជិត ២០ តុ ដែលប្រារព្វធ្វើថ្ងៃ ទី ១៨ ខែកុម្ភៈ ឆ្នាំ ២០២១ នៅបុរីគ្រិសស្តាល់ ក្រុងតាខ្មៅ ខេត្តកណ្តាល» ។
គួរឲ្យដឹងថា ពិធីមង្គលការរបស់តារាចម្រៀងរៀមច្បង សាន សុខកក្កដា រៀបចំឡើងខុសប្លែកពីតារាដទៃទៀត ក៏ព្រោះអ្នកនាង និង ស្វាមី បានរៀបចំទទួលភ្ញៀវនៅអាហារថ្ងៃត្រង់តែប៉ុណ្ណោះ ។ យ៉ាងណាមង្គលការនេះក៏មានការចូលរួមពីសំណាក់មិត្តសិល្បកររួមជំនាន់យ៉ាងច្រើនផងដែរ ៕