ឈិន សុធារី ធ្វើខួបស្នេហាផ្អែមដូចស្ករតាំងម៉ែ តែមិនព្រមទម្លាយរឿងនេះ

ពេលនេះដែរអតីតពិធីការិនី ឈិន សុធារី កាន់តែបើកចំហពីចំណងស្នេហ៍របស់ខ្លួនជាមួយគូស្នេហ៍ថ្មី ក្រោយពីបានភ្ជាប់ទំនាក់ទំនងជាមួយគ្នាមួយរយៈមក ។ អ្វីដែលចាប់អារម្មណ៍ប៉ុន្មានថ្ងៃមុននេះ ឈិន សុធារី ក៏បានធ្វើខួបនៃក្តីស្រឡាញ់ដែលមើលទៅពិតជាផ្អែមល្ហែមមិនចាញ់គូស្នេហ៍យុវវ័យប៉ុន្មានឡើយ ។

បើទោះជាពិធីបែបសាមញ្ញដោយគ្រាន់តែជួបជុំមិត្តភក្តិជាមួយនឹងការ Surprise នំខេកក៏ពិតមែនតែមើលទៅ ឈិន សុធារី ពិតជារំភើបជាខ្លាំង ប៉ុន្តែក្នុងនោះ ឈិន សុធារី មិនបានបង្ហើបថាខួបនៃក្តីស្រឡាញ់របស់នាងមានរយៈពេលប៉ុន្មានឆ្នាំឡើយ ។ បើពិនិត្យមើលកាយវិការរបស់ ឈិន សុធារី និងគូស្នេហ៍ថ្មីពិតជាផ្អែមល្ហែមដូចប្តីប្រពន្ធ បើទោះពួកគេមិនទាន់រៀបការតាមប្រពៃណីខ្មែរក៏ពិតមែន ។ ក្នុងនោះក៏មានការជូនពរឱ្យ ឈិន សុធារី និង គូស្នេហ៍ថ្មីស្រឡាញ់គ្នារហូតដល់ចាស់ ហើយខ្លះទៀតក៏បានសរសើរថា ឈិន សុធារី សំណាងណាស់ព្រោះដៃគូនាងលើកនេះជាបុរសដែលមានទ្រព្យហើយ ថែមទាំងចេះយល់ចិត្ត ក៏មានឋានៈ នៅក្នុងសង្គមថែមទៀត ។

ហាក់ខុសពីតារាដទៃក្រោយចែកផ្លូវជាមួយអតីតស្វាមីលោក សុវណ្ណ មករា មក ឈិន សុធារី មិនបានវិលចូលមកចាប់ផ្តើមការងារសិល្បៈវិញឡើយ ពោលពេលនេះ ឈិន សុធារី បានងាកទៅចាប់អាជីពជំនួញដែលសព្វថ្ងៃមានការបង្ហើបថាមានរបរជាច្រើននៅក្នុងដៃជាពិសេសក្រោយនាងភ្ជាប់ស្នេហ៍ជាមួយដៃគូជាអ្នកជំនួញ៕

រូបថត ៖ ហ្វេសប៊ុក